KUCHING: Sebengkah randau dikena mutarka isu leka jaku ‘Allah’ enda chukup engkeman enti sema ngelaungka orang ke megai pengarap Keristin ari Sabah enggau Sarawak.
Tu ukai ketegal mayuh orang ke bepengarap Keristin diau di Sabah enggau Sarawak tang ketegal orang Keristin ba kededua nengeri tu balat irauka pengelikun senentang selangkuh tubuh enggau jalai pengarap kaban Keristin ke diau di Semenanjung Malaysia, ku Chairman Gempuru Besai Keristin Jaku Iban Malaysia (GBKJIM) Ps Greman Ujang Slat.
“Randau tu manah tang nya enda tau enda dibuka ngagai semua gerempung Keristin ngambika sida tau mantaika pugu runding bepelasarka Sabah enggau Sarawak nya nengeri ke tebal diuan orang bepengarap Keristin.
Kami irauka bala kami ke gawa sereta belajar di Semenanjung keba nya sada ari Sabah enggau Sarawak enda tau enda dipending,” ku Greman lebuh ke dikerandau kilah ensana.
“Kami irauka pengelikun kaban kami, nyengkaum selangkuh tubuh sida mega pengarap sida,” ku sebana iya lebuh bekenangka perambu Opis Penyerakup Bansa enggau Integrasi (NUID) deka ngatur randau betambit pintu antara Opis Pekara Pengarap Islam Selangor (Jais) enggau Gerempung Alkitab Malaysia (MBS) dikena mutarka penyarut bekaul enggau leka jaku ‘Allah’.
Diretor Besai NUID Datuk Azman Amin Hassan madah, pekara nya patut diputar nengah jalai randau ngambika negutka kaul enggau pemaik antara orang ke ari mayuh bengkah jalai pengarap di menua tu seraya nyeliahka penyadi ke enda manah.
Pia mega lebuh dikerandau, Menteri Pemansang Tanah Tan Sri Dr James Masing madah, NUID enggau Jais patut jampat duduk lalu berandau bekaul enggau pengawa berampaska Alkitab enggau Bup Kudus.
