KUCHING: Pengawa nguji deriba kerita Great Wall ti mega bisi ngundan Kaban Kunsil Nengeri (ADUN) Asajaya Abdul Karim Rahman Hamzah betapi enggau penusah bebadi mit ba jalai alun.
Taja pia, Karim nadai balat bakal tang semina deriba ti bisi telih balat ba pala.
Sama bisi dalam kerita model Wingle 5 bansa Great Wall nya, CEO Greenorange, Sales & Servisce Sdn Bhd, Sheikh Muhamad Azli Tan Sri Sheikh Muhamad Nasuddin enggau Executive Director YLH Autoworld Sdn Bhd, Hong Boon Pau.
Karim ti mega Menteri Muda Pemansang Nembiak lebuh dikerandau pengudah penusah nya nyadi, iya madahka diri bisi pedis mimit ba jari kiba.
“Aku sama bisi dalam kerita maya penusah nya nyadi. Aku nadai balat pedis semina deriba ti bisi telih ba pala, ngarapka iya jampat belinsur manah.
“Kami semua ngena tali pengelikun, penusah nya nyadi lebuh kerita nya bisi laju mimit maya surut ngujungka tungkup ba sepiak deriba, lalu cheremin kerita nya bisi pechah sereta bisi kena pala deriba.
“Taja pia, tu ukai ke penanggul aku agi muji kerita Great Wall tu endang kereta ti manah,” ku Karim ti nyadi Menteri Muda Pengawa Berumah lebuh dikerandau pengarang berita.
Kelimpah ari nya, Azli lebuh ditanya bekaul enggau penusah ke nyadi iya madah, nya keterubah iya nyadi dalam mayuh bengkah pengerami ti sebaka ke kala diatur tujuh kali ba Borneo enggau 10 kali di Semenanjung Malaysia.
Ku iya dikena ngenukuka pengelikun, sida deka berati sereta mansik pengilap sereta pengelemi kereta nya.
Nambahka nya iya madah, ari penusah bebadi maya sesi nguji deriba kerita Great Wall, nunjukka kereta nya bisi kualiti laban ti enda balat rusak.
Iya madah, penusah nya nyadi dipelabaka berindik ari pengilap mensia.
“Tu keterubah iya pekara ti baka tu nyadi, pelaba aku tu ketegal pengilap mensia tang tu mega nunjukka kereta nya bekualiti, taja pan kerita nya tungkup tang agi manah.
“Kitai deka ngadu pansik ba kerita nya, kitai mesti bisi ngembuan tanggungpengawa laban tu bekaul enggau pengelikun,” ku Azli.
Deriba iya nya Muzamin, 40, ti telih ba pala ketegal penusah nya dianjung berubat ngagai sepital.
No comments:
Post a Comment