Friday, 11 January 2013

Atur ngena duit sama ba serata nengeri di Malaysia, ku Karim

Posted on January 11, 2013, Friday

KUCHING: Pengawa ngagih tauka ngena duit ari perintah nengeri enggau perintah besai endang pengawa ke biasa di­gaga, nya ukai semina digaga perintah nengeri ke dipegai Barisan Nasional (BN) tang mega dikereja Pakatan Rakyat (PR) ba nengeri ke dipegai sida baka ba Pulau Pinang enggau Selangor.

Kaban Suprem Kunsil Parti Pesaka Bumiputera Bersatu (PBB) Abdul Karim Rahman Hamzah (gambar) madah, maya nimbal jaku tuduh Kaban Kunsil Nengeri (ADUN) Kota Sentosa Chong Chieng Jen bekaul enggau penyampau agih RM11 billiun ke enda dipeda dalam bajet perintah nengeri.

Abdul Karim, ke mega ADUN Asajaya madah, pen­erang Chong bekaul bajet nengeri ke enda dipeda nya mandangka iya enda nemu enggau dalam prosedur bajet enggau kira-kira.

“Iya (Chong) bejaku munyi nya baka penemu nembiak mit ti nadai ngembuan tang­gungpengawa sereta nguji ngasut runding rayat mantaika penemu ke enda betul bekaul enggau Kepala Menteri ke madahka nya semina ngun­tungka KM enggau kroni iya ke bukai,” ku iya madah ngagai The Borneo Post kemari.

Iya ke lalu nyadi Menteri Muda Pemansang Raban Nembiak ngelalau Chong enda ibuh mantaika politik kedai kopi tang aruh ngembuan timpai ti jauh sereta ngembuan tanggungpengawa mantu rayat ke diarika iya.

Abdul Karim madah rayat enda muntang dikemula nen­gah isu ke dibantaika penyakal ti madah RM11 biliun ke enda dipeda ba bajet nengeri nya tau dikumbai bajet nengeri ungkup nengeri aja, ke mega sebengkah ari perintah Malaysia ke udah nerima agih ukai semina ari ijinsi pengawa dagang dalam menua tang mega ari asil bukai.

“Sapa iya YB Chong ti bejaku beli sereta mansutka penemu nya? Penyampau asil ke tinggi tu mandangka perintah nengeri Sarawak landik ngurus pekara wang,” ku tandu iya.

Abdul Karim mega madah penyampau agih ke diterima semua nengeri serata Malaysia semina untung kurang ari sepa­ruh ke udah ditetapka perintah nengeri nya empu.

“Nya alai, nama reti utai tu? Nuju YB Chong, pansik dulu penerang sebedau nuduh perintah nengeri,” ku iya.

Abdul Karim madah rambau Aum Bajet Kunsil Nengeri (DUN) Pulau Pinang, perin­tah BN Pulau Pinang ngaku ADUN perintah nengeri Pulau Pinang udah tuai runding maya nyaut tanya ari ADUN BN.

“Tang ba Sarawak, Chong mengkang enda nanya maya ba DUN suba lalu tu mandangka penemu iya ba kira-kira eng­gau prosedur bajet agi pabu,” ku iya.

No comments:

Post a Comment

Note: only a member of this blog may post a comment.