Jaku Chong nya mega ngenyima ati raban BN
KUCHING: Jaku sindir Chairman DAP Menua, Chong Chieng Jen ke ngelalau Komiti Pengawa Bepilih (SPR) pengudah opis nya mansutka pemutus sebelas iti sitak baru, majak narit ati raban Barisan Nasional (BN).
Kaban Pemesai Kunsil Parti Pesaka Bumiputera Bersatu (PBB) Datuk Abdul Karim Rahman Hamzah, madahka jaku Chong ke munyi nya enda ngelantangka ati sida ti ngasuh SPR tama BN.
Chong dalam jaku iya madah, pengawa numbuhka garis entara sitak baru ke dipejalaika SPR tu tadi enda nitihka penemu ke patut lebuh magi garis entara sitak menua ku iya, ti ngujungka Chong madah SPR tau minta masuk parti politik ke-14 BN menua tu.
Abdul Karim madah, jaku Chong ke munyi nya enda patut dipansutka iya, munyi baka ke nyindir tauka ngemelika SPR masuk BN, seraya madahka 11 iti kerusi nya baru diperambu lalu nutis nya dipandang ngagai mensia mayuh.
“Enti Chong ulih mulaika pengingat iya empu, kerusi Kota Sentosa nya kelia pan, sama digaga baka nya, ke dimenang iya empu (Chong), nya alai Opis SPR mega ti diasuh ngaga baru garis entara sitak, enti SPR deka ngemeratka BN menang, Chong enggau DAP enda duduk di kerusi Kunsil Nengeri (DUN) sida iya baka ke diatu,” ku Abdul Karim madah, lebuh dikerandau kemari.
Abdul Karim, ti mega nyadi Menteri Muda Pemansang Nembiak (Nengeri) madah, kerusi ke disengkaum dalam 11 iti sitak nya, kerusi baru, lalu nadai seiku ke ulih ngenukuka BN tauka penyakal menang ba kerusi nya.
“…nya alai, bakani ku Chong tau berundingka semua kerusi baru ti digaga SPR nya meri penguntung ngagai BN? Nya jaku ke enda ngena runding sereta enda disadang pansut ari mulut ADUN Kota Sentosa,” ku ADUN Asajaya nya.
“Bebasa meh ke pengundi menua pesisir. Sida ke diau di nengeri udah bisi perengkaguna magang baka api jalai, rumput ditebas, parit pan dilasi, jalai baru sereta mayuh perengkaguna bukai, enti dibanding enggau menua pesisir ke lama udah nganti enti deka meda jalai kami dipelakin tauka jematan digaga,” ku Jeguk.
Iya madah, taja pan penemu Chong nya disanggup nitihka konsep undi seiku-ngagai-seiku, tang pemun iya, sama asai ba tetiap iku ke deka ngasaika pengelantang ti bisi disediaka Perintah ba semua sitak.
Nandu nya baru, iya madah DAP patut beterima kasih ngagai SPR laban magi garis sitak menua ti nyendia sitak ke mit agi, alai iya tau nyadi ‘bonus’ ke Program Mansang Ngagai Menua Pesisir DAP.
“Pelaba aku, BN enda nagang DAP bediri ba semua sitak menua pesisir, enggau penyampau pengundi ke mimit,” ku iya.
No comments:
Post a Comment