Wednesday 14 January 2015

DAP patut meretika Akta Pilihan Raya, Akta Perlembagaan Persekutuan sebedau mantah


KUCHING: Parti Tindakan Demokratik (DAP) dipinta macha sereta meretika Akta Pilihan Raya enggau Akta Perlembagaan Persekutuan sebedau ngepunka sebarang kimpin ngulihka sain jari bekaul enggau pemutus muka sitak DUN baru pengawa bepilih kunsil nengeri (PRN) ngagai Komiti Pengawa Bepilih (EC).

Seiku kaban Kaunsil Pemadu Tinggi Parti Pesaka Bumiputera Bersatu (PBB), Datuk Abdul Karim Rahman Hamzah, madah, DAP udah ngepunka kimpin ngulihka sain jari dikena mantah raban pemesai parti enggau raban parti ke bukai ngambi ke besetuju enggau pemutus netapka sitak baru PRN nya.

“DAP patut macha enggau silik Akta Pilihan Raya enggau Akta Perlembagaan Persekutuan sebedau mansutka sebarang bantah sereta ngepunka kimpin ngulihka sain jari dikena mantah pemutus nya,” ku Abdul Karim.

Karim ke mega Kaban Kunsil Nengeri (ADUN) Asajaya mansutka penemu nya lebuh dirandau pengarang berita, kemari.

Iya bisi ditanya bekaul enggau tuju DAP Sarawak ngatur kimpin dikena ngulihka sain jari dikena mantah pemutus perintah netapka 11 buah kerusi sitak DUN nengeri Sarawak ke baru empai lama ke udah.

Chairman DAP nengeri, Chong Chieng Jen madah, kimpin nya deka belabuh dipejalaika ba bagi menua sepiak selatan nengeri tu lalu disempulang puak menua sereta deka bepengujung di utara nengeri Sarawak, tang pemutus nya deka diputuska enda lama agi.

Abdul Karim ke mega Menteri Muda Pemansang Raban Nembiak Pengawa Berumah Sarawak, madah, pekara nya ngembuan proses ke engkeman ari raban pengundi dikena mantaika bantah sida.

EC udah mutus muka 11 sitak DUN baru ungkup PRN ti deka datai. Entara kerusi baru ke diputuska iya nya Batu Kitang, Stakan, Gedong, Kabong, Tellian, Selirik, Murum, Samalaju, Long Lama, Triboh enggau Serembu.



Read more:

No comments:

Post a Comment