Monday 6 October 2014

Program Lumba enggau Main KDJA-MLNG mulaika pengeregas raban pemberita gawa


KUCHING: Raban pemberita ari media chelak enggau elektronik sempat mulaika pengeregas ngereja pengawa seraya ke belelak, ngelengkaka komputer, pen enggau ‘tablet’, lalu sama-sama belelak nengah program lumba enggau main ti bisi di atur Gerempung Pemberita Pelilih Menua Kuching (KDJA) begulai enggau Malaysia LNG Sdn Bhd (MLNG).

Program ke diatur Hari Enam tu tadi dipenyadi Menteri Muda Pemansang Nembiak (Nengeri) Datuk Abdul Karim Rahman Hamzah sereta digulu Chairman KDJA Sulok Tawie, Presiden Gerempung Sarawak Lawn Tennis ti mega pemesai opis ke nyaga Le Park Dato Patrick Liew, Ketuai Corporate Affairs MLNG Norazibah Mohd Rabu enggau Ketuai Nembiak PBB Satok Iskandar Sharkawi.

Abdul Karim dalam jaku iya madah program raban pemberita begulai enggau sebengkah industri minyak enggau gis, sigi dikelaluka laban pengawa lumba enggau main bansa tu ukai semina pengawa CSR (Tanggung Pengawa Rama Korporat) MLNG aja tang seiti pengawa pengerai ke manah ungkup raban pemberita ke endang ditemu seruran gawa enda ngira jam tang patut bisi awak endur betatika pengerai diri empu.

“Pengawa pengerai baka tu ukai pengawa ke sekali setaun digaga tang patut dikemeratka ninting maya, enti ulih ninting hari kitai eksasais.

“Kelimpah ari nya mega, pengawa lumba enggau main bansa tu mai raban pemberita begempung enggau pangan diri bemain,” ku Abdul Karim.

Ba atur pengawa nya mega, Abdul Karim meri geran RM7,000 ngagai KDJA kena gerempung nya bejalaika aktiviti udah tu.

Pengudah bejaku ba atur pengawa nya, Abdul Karim ti mega nyadi Menteri Muda Pengawa Berumah dibai begulai enggau bala temuai ke bukai nguluka bala pesereta program betanda ‘Zumba’ diuluka raban Amber Studio, MJC Batu Kawa.

Atur pengawa lumba enggau main raban pemberita bepun enggau pengawa ‘kick-off’ Futsal ulih menteri muda nya, ke ditangkan enggau bala nembiak baruh 16 taun ari ‘First Touch Soccer Development’ ari sitak Petra Jaya enggau Kuching ti bisi dibai ulih Iskandar mandangka pengelandik sida iya bemain futsal.

Akademi bol ti direjista tiga taun tu ke udah, direjista baruh ‘Sarawak Sports Commission’ ngembuan juluk deka ngangkatka pengawa bemain futsal di menua tu kelimpah ari ngiga bala nembiak ke landik bemain futsal.

Entara media chelak enggau elektronik ke sama bisi nganjung pengari rambau program tu iya nya Utusan Borneo, The Borneo Post, Bernama, International Times, The New Sarawak Tribune, Utusan Sarawak, Kumpulan Media Prima (TV3, Berita Harian, Harian Metro), See Hua Daily, Sin Chiew Daily, United Daily News, Utusan Malaysia enggau Opis Pemadah.

Entara aktiviti pekit lumba enggau main ti bisi diatur main Futsal (6 tim), ‘Sandwich Ball’, Bebatak Tali enggau Bowling Nyiur.

Main ‘Sandwich Ball’ dipeda balat ngerangkai ngeli lebuh raban pemberita diasuh ngepit buah bol bepasang ngena belakang serayaka ngena kain baka orang indu nyentuk datai di adan, buah bol nya enda tau labuh (laban enggai ke diasuh berengkah ari pun).
  

No comments:

Post a Comment