KUCHING: Opis Menteri Pekara Wang patut nerangka silik dulu chara ti deka dipejalaika tauka ngena formula ke benung dikena diatu ke deka pulaika pengelantang rayat.
Menteri Muda Pemansang Nembiak Datuk Abdul Karim Rahman Hamzah madah (gambar), Opis Menteri Pekara Wang patut madahka bagi tikas gaji orang bepenatai pemisi tinggi sebedau dipejalaika.
Iya bepenemu opis menteri pekara wang patut milih bagi chara ke betul sekalika narit semua sabsidi RON95 tauka mengkang enggau formula ti benung dipejalaika diatu.
“Kitai semina begunaka penerang ti silik agi pasal pekara tu. Aku enda nemu sapa ti dikategorika sida raban orang ti bepenatai pemisi tinggi tauka begaji besai lalu baka ni chara nyual minyak tu ngagai raban nya.
“Semina ba penemu aku, laban kitai udah bisi RON75 ti bisi sabsidi nya alai enti deka nyual RON95 nadai sabsidi tau jual aja ngena rega nadai sabsidi, enda ibuh meh dibagi ngagai kategori begaji besai tauka enda begaji besai.
“Tauka tetapka aja penyampau rega RON95 nitih formula ke diatu, enda ibuh diubah,” ku iya lebuh ditanya Utusan Borneo bekaul enggau raban ke bepenatai pemisi tinggi tauka meli RON95 nitihka rega makit.
Ba riput surat kabar kemari, dalam aum pengarang berita ke diatur nyerumba licha Chukai Barang enggau Servis (GST) di Bangi ungkup pemesai kanan Opis Menteri Pemansang Menua Pesisir enggau Kandang Menua (KKLW) sereta ejensi ari baruh opis menteri nya ensanus, Sapit Menteri Wang Datuk Ahmad Maslan madah, berengkah ari bulan Jun 2015 orang ti bepenatai pemisi tinggi tauka begaji besai deka meli petrol RON95 nitihka rega markit.
Ku iya, sistem nya lebih manah sereta lurus agi laban semina raban ke patut aja tau meli petrol RON95 nitihka rega sabsidi.
Rega RON95 diatu iya nya RM2.30 seliter.
“Sida deka mayar rega RON95 nitihka rega markit. Chunto, enti rega iya RM2.58 sen baka diatu, sida deka meli rega RM2.58 nya mega. Nyema rega minyak dunya nurun, rega sida meli pan nurun. Enti niki, sida enda tau enda meli ngena rega ti tinggi” ku Ahmad ensanus.
Iya mega arapka sapit menteri wang nya nemu magi orang dagang peribit ba kategori ke betul.
Kelimpah ari nya Karim mega ngarapka subsidi petrol RON95 enda dikurang taun baru, ke lebih agi maya GST berengkah dipejalaika ila.
“Kitai ngarapka maya GST berengkah dipejalaika, rega petrol RON95 enda ditiki, ngambi pulai ke pengelantang rayat,” ku iya ti mega nyadi Kaban Kaunsil Besai Parti Pesaka Bumiputera Bersatu sereta mega Menteri Muda Pengawa Berumah.
No comments:
Post a Comment