Sunday 30 June 2013

Bala peminat ngerami pemenang Tim Sarawak ba Liga Premier 2013


KUCHING: Urung 1,000 iku peminat begelumu di Padang Merdeka kemari ngerami pemujur tim main bol Sarawak nyadi champian Liga Premier 2013.

Raban pemain enggau staf pematih mai tropi champion berengkah ari Jalai Tun Abdul Rahman nuju Padang Merdeka.

Presiden Gerempung Bolasepak Sarawak (FAS) Datu Sudarsono Osman madah, semengat baru udah dipandangka peminat main bol Sarawak lalu mujur ngangkatka semengat pemain.

“Penyukung Sarawak amat manah lalu meri semengat baru ngagai raban pemain ngambika bebendar agi bemain ba atas padang,” ku iya.

Ku iya nambah, pemujur Sarawak nyadi champian ukai sebengkah pekara ti mudah ke alai tiap iku pemain enggau pematih udah bebendar bejalaika tanggung pengawa diri ngambika mujur dalam semua pekit.

Sebedau liga berengkah, FAS netapka tagit nyadi champian liga, bemain ba Liga Super lalu enda alah ba tiap main dalam liga, tandu Sudarsono.

“Dua tagit udah dijapai, tagit ke penudi iya nya ngenanka rikut enda kala alah,” ku iya.

Sarawak deka besatup enggau Sabah kenaka 5 Julai ke nyadi main ke penudi ba liga taun tu.

Berindik enggau pemujur nya, Sudarsono netapka tagit baru ngagai tim ti dilatih Robert Albert ngambika tau mantaika gaya main ti manah agi ba pekit Piala Malaysia.

Ba kaul nya mega, Menteri Muda Orang Nembiak Abdul Karim Rahman Hamzah ngenataika pengaga ati enggau pemujur Sarawak nyadi champian liga pengudah nganti pengelama 16 taun.

“Taun tu tim main bol kitai nempa sejarah pengudah nyadi champian liga.

Bela datai Sapit Sekretari Perintah Nengeri Datu Misnu Taha sereta Kepala Polis Sarawak Datuk Acryl Sani Abdullah Sani.
   

No comments:

Post a Comment