KUCHING: Kaban Kunsil Nengeri (ADUN) Asajaya Datuk Abdul Karim Rahman Hamzah minta perunding Opis Tanah enggau Survei (JTS) nambahka baru Skim Pembesaran Kampung di pelilih mit menua nya (Asajaya).
Menteri Muda Pengawa Berumah nya madahka nya berindik ari peminta enggau penyampau peranak menua kandang menua nya ti majak nambah.
Iya madahka penambah Skim nya di Asajaya mega setipak enggau pemayuh pemansang ti deka dipejalaika nyengkaum jematan Batang Samarahan ti dipelabaka tembu taun 2018.
“Dalam nengeri Sarawak, pelilih mit menua Asajaya pemadu mayuh Skim Pembesaran Kampung lalu skim tu deka pajak dipejalaika ba pelilih mit menua tu.
“Bepelasarka peminta peranak Kampung, kami ngarapka JTS ulih berundingka peminta Kampung Sambir sereta Kampung Tembirat ti minta tambah (skim nya) ke nyadi Kampung Tambirat Fasa 2.
“Kami mega minta diperundingka JTS ngambika nambahka baru skim nya ba Kampung Tambey enggau Kampung Baru dikena napi peminta kededua Kampung nya ti majak nambah, senipak enggau pemansang jematan di deka digaga ti nyadi penyambung (kededua Kampung),” ku iya.
Abdul Karim mansutka pekara nya lebuh bejaku ba pengerami nyuaka Surat Pala tanah kampung Tradisi enggau Lesen Pendudukan Sementara (TOL) pelilih mit menua Asajaya ti diatur JTS ba Kompleks Sukan Asajaya ditu, kemari.
Pengawa nya kemari dipenyadika Menteri Pengatur Pemansang Pengeraja Asal enggau Rampa Menua II Datuk Amar Awang Tengah Ali Hasan.
Skim Pembesaran Kampung iya nya sebengkah skim penempatan kerajaan dikena napi penambah pemayuh mensia ba Kampung Tradisional di nengeri Sarawak.
Nengah skim nya, peranak Kampung diberi peluang diau ba endur ti lantang enggau likun lebih agi ruang bilik ti udah betambah ke diau ba kandang Kampung Tradisional ti endang udah bisi tang nyau sekut.
Kemari bisi 81 iku ari Kampung Sambir (36) enggau Kampung Bangka Semong (45) nerima surat pala tanah dibaruh Seksyen 18 Kanun Tanah Negeri di baruh Program Pengukuran dan Pengeluaran Surah Hak Milik Individu Kampung Tradisi.
Nambahka nya 191 Lesen Pendudukan Sementara (TOL) diberi ti mungkur lima (5) skim Pembesaran Kampung di pelilih menua Asajaya nyengkaum Skim Pembesaran Kampung Tambirat (2 TOL); Skim Pembesaran Kampung Asajaya Masjid (38 TOL); Skim Pembesaran Kampung asajaya Ulu (30 TOL); Skim Pembesaran Kampung Mang (37 TOL) enggau Skim Pembesaran Kampung Sebandi Matang/Ulu (84 TOL).
“Seharitu perintah ngamatka semaya, taja pan kita lama nganti. Kitai ngarapka nengah skim ke dipejalaika tu ti beratka pengelantang enggau pengelikun mayuh penanggul ulih diputar nyengkaum penusah angus, laban sebedau tu perabung rumah besambung,” ku iya.
No comments:
Post a Comment