KUCHING: Pemutus Kot Ngapil ba apil Ketuai Penyakal Malaysia Datuk Seri Anwar Ibrahim ti dibantai ba kot nya kemari udah netapka Anwar salah dalam kes tu lalu dijil lima taun nengah Genteran Tusun Ukum Seksyen 377B Penal Kod, ari Ketuai Akim Menua Malaysia, Tun Ariffin Zakaria ti sama digulu lima iku raban luyar bukai.
Anwar ditemu salah ketegal (sodomising) ex-pemantu iya, Mohd. Saiful Bukhari Azlan.
Ari sebuah berita portal kemari, luyar Anwar, Gopal Sri Ram lebuh mantaika penemu iya ba pemutus kot nya madahka Anwar ke nyadi anak guam iya, ukai orang biasa lalu nadai seiku orang ke enda rinduka personaliti iya.
Iya nandu baru, Ketuai Penyakal nya, udah mayuh mantu perintah enggau menua tu empu, lalu minta Kot berundingka penemu nya. Iya mega minta dipandakka ari lima taun baka ti udah ditetapka Kot Ngapil.
Pendawa raya betuaika Muhammad Shafee Abdullah madahka jil 20 taun ke pengabis lama tang disipat nya, enda relevan. Lima taun jil, ku Shafee dikira enda chukup, alai iya minta ukum jil nya lebih ari enam taun, ketegal penyalah keterubah, lalu madahka tu penyalah kedua digaga Ketuai Penyakal nya, ba penyalah ke sebaka.
Taja pia, iya madah setuju enggau penemu luyar Anwar ke madahka Anwar sigi udah mayuh mantu menua tu, tang ‘iya enda mandangka iya empu nesal ati’. Tinggi agi pangku pengawa, besai agi penyalah, ku Shafee.
Ba Kot nya kemari, lebuh nimbal pemutus, Anwar ari dalam kandang orang ke salah, madahka kes tu seiti konspirasi Menteri Besai Datuk Seri Najib Tun Razak seraya nanyaka kredibiliti ba ulah Saiful empu.
Nimbal nya, Ariffin madahka nadai nemu bisi konspirasi politik. Anwar ngenadaika penyalah ukai reti, timbal iya (Anwar) ulih diterima, laban konspirasi politik ti dipadah Anwar nadai bukti ti tegap, ku iya.
Ba pemutus Kot Ngapil nya kemari mega Pengemata Hak Mensia, mantah pemutus kot, lalu ngumbai nya ngemeli tauka ngelemika basa ke hak sereta demokrasi di Malaysia, ku Sapit Direktor Asia Pengemata Hak Mensia Phil Robertson.
Berindik ari pemutus nya, timbal ti diterima ari pemesai parti politik di menua tu pan, meri penemu sida iya ba sentang pemutus Kot Ngapil nya, ke alai Menteri Pemansang Tanah Tan Sri James Masing madahka Malaysia diperintah Undang-undang (Ruke of Laws), ke ngujungka Anwar ditemu salah sereta diukum nengah undang-undang, ku Masing.
“Nya penemu ke logik ba aku sesapa ke ngelanggar undang-undang. Ba penemu aku, pengamat enda mida penuduk seseiku, bansa tauka pengarap. Nya jalai ke patut.
“Taja pia, kitai pan enda ngelanggar undang-undang nya nitihka peneka kitai, dalam kes Anwar lebuh iya lepas dalam timpuh lima taun ke udah. Taja pia, diatu undang-undang Malaysia enda bechiping maya Anwar ditemu salah nengah undang-undang ke sebaka,” ku Masing nimbal nengah pesan jaku pandak (whatsapp) kemari.
Iya nandu baru, Anwar enggau bala penyukung iya, sekeda ari penyukung nya orang ke benama sereta raban orang ke bepengelandik dalam undang-undang, sida iya patut nemu agi, ku iya.
“Kitai enda ulih musin tauka nyalin undang-undang nitihka agenda kitai empu,” ku iya.
Mandal Chairman Parti Keadilan Rakyat (Sarawak) See Chee How madahka pemutus Kot Ngapil nya semina ‘ngapi’ politik ke deka ngangkatka kuasa rayat beratika aspirasi rayat Malaysia, ke nyadi pemerat Anwar ngelama tu.
“Kami bekunsi penyinu ati kami enggau bini iya Dato Seri Wan Azizah sebilik, lalu kami bediri tegap enggau sida iya sereta ngelalau iya ngemaru sereta chakah agi nampung pengawa politik ti diari DSAI (Datuk Ser Anwar Ibrahim).
“Nya alai, kita enda tau enda nampai jauh ari tu laban DSAI enda diperinsa taja pan iya kala dijil. Ba ‘Central Leadership Council’ DSAI udah mandangka, Pengawa Bepilih Besai di Sarawak nyadi pemerat dikena ngempung semua rayat Malaysia ngulihka pengamat, perintah ke manah sereta menua Malaysia ke manah agi ungkup semua rayat Malaysia,” ku See ti mega seiku luyar.
Menteri Muda Pengawa Berumah ti mega nyadi Menteri Muda Pemanang Nembiak (Nengeri) Datuk Abdul Karim Rahman Hamzah, ti mega seiku orang ke pakar dalam undang-undang ngenataika penyinu ati iya ngagai sida Anwar sebilik, laban Anwar ku iya, seiku orang politik ke tebilang sereta udah mayuh ngubah lanskap politik Malaysia.
“Aku kasih ke iya, ke lebih agi sida sebilik. Anwar udah ngasaika kelalu mayuh pemedis, nyengkaum lanskap politik Malaysia ke jauh udah berubah diatu lebuh iya (Anwar) nyadi raban penyakal.
“Nadai seiku penulis politik enda nulis pasal iya. Taja pia, karier politik iya badu naka tu aja,” ku Abdul Karim ti mega nyadi seiku Kaban Kaunsil Besai Parti Pesaka Bumpiutera Bersatu (PBB).
Chairman Parti Tindakan Demokratik (DAP Sarawak) Chong Chieng Jien madah, pemutus ti digaga kot nya nya enda ngelantangkaba chara pemutus nya digaga laban pemutus nya mandangka integriti di Malaysia dipejalaika.
“Sehari tu ukai hari ke manah ngagai demokrasi di Malaysia. Semua rayat Malaysia ke ngembuan runding sereta penemu pasal pemutus ke enda bechiping patut ingat ke pemutus ti digaga kot seharitu, iya nya hari ke pemadu mar dalam sejarah Malaysia. Nya alai, pengeringat sereta enda lantang ati bansa tu tau di pandang nengah ulah kitai ke deka berubah,” ku Chong.
No comments:
Post a Comment