SIBU: Parti Islam SeMalaysia (PAS) deka ngelebu diri ngirai chalun sida bediri ba enam iti penuduk Kunsil Nengeri (ADUN) maya pengawa pengawa bepilih nengeri ti deka datai.
Komiti Besai Parti Pesaka Bumiputera Bersatu (PBB) Datuk Abdul Karim Rahman Hamzah madah, PAS deka nangkup Barisan Nasional ke lebih agi PBB ngerebut penuduk nya.
“Sida tau nguji ngapa lalu ngarap sida nempa pemujur maya nya ila,” pia ku iya madah ngagai pengarang berita, kemari.
Ku iya, kebuah iya andal nyebut munyi nya laban PAS parti ti datai ari Semenanjung Malaysia lalu rayat nengeri Sarawak ngembuan kaul ke manah entara pupu raban bansa ngelama tu.
Abdul Karim ti mega Menteri Pemansang Raban Nembiak enggau ADUN Asajaya madah, PAS ulih bediri ba dini-dini penuduk maya pengawa bepilih ila.
Ku iya, PAS udah ngaga pansik lalu bisi chalun ti engkeman bediri ba enam iti penuduk nya taja bedau berandau enggau komponen parti dalam Pakatan Rayat ke bukai.
Kilah ensana, PAS madahka diri bisi ati deka bediri ba DUN Beting Maro, Sebuyau, Sadong Jaya, Muara Tuang, Tanjung Datu enggau Kuala Rejang (Belawai).
Bekaul enggau pekara nya mega, Mengeri Muda ba Opis Kepala Menteri (Hal Ehwal Islam) Datuk Daud Abdul Rahman pechaya PAS enda ulih menang ba sebarang penuduk maya pengawa bepilih nengeri ti deka datai.
“Kitai enda ulih nagang sida bediri ditu laban menua kitai menua demokrasi”.
“Tang anang enda ingat, sebedau tu PAS enda kala mujur bediri ba nengeri tu lalu kitai pechaya rayat mengkang nyukung tegut perintah BN,” pia ku iya madah.
No comments:
Post a Comment