Thursday 26 February 2015

Laman rama chara moden nyual sereta nyadung dadah di menua tu

February 26, 2015

KUCHING: Opis Narkotik, Polis Diraja Malaysia (PDRM) tetap beratika laman rama mensia mayuh baka Facebook ti nyadika kereban dikena bejualka dadah, madahka pengawa diri empu salah nguna dadah tauka endur ngulihka dadah, taja pan pengawa salah nya agi mimit di menua tu.

Kepala Opis Narkotik PDRM Supt Lukas Aket madahka polis sigi beratika aktiviti Facebook bala nembiak ke nyata mantaika gambar diri salah nguna dadah, madahka palan endur ngambi dadah tauka pemadah bukai bekaul enggau aktiviti dadah.

“Iya, kami sigi beratika aktiviti dadah ti dipandangka dalam Facebook sereta nengah telefon binching bala nembiak,” ku Lukas madah lebuh dikerandau ba aum media Khas Komiti Pengatur PEMADAM Menua Sarawak beserimbai enggau atur pengawa ‘Jasamu Dikenang ke ex-chairman PEMADAM Sarawak Datuk Sharifah Mordiah Tuanku Fauzi’ di sebuah hotel ditu, ensanus.

Atur pengawa nya ke bela digulu Chairman baru PEMADAM ti dipadu Kepala Menteri Sarawak Datuk Abdul Karim Rahman Hamzah (nganti Sharifah Mordiah) madah, kerejasama ari mensia mayuh sigi diperansang enti sida iya bisi tetemuka Facebook orang ke tampak dipeda nyual dadah tauka mandang aktiviti sida salah nguna dadah, tau ngeripot pekara nya ngagai Opis Narkotik, PDRM.

“Ripot ari mensia mayuh sigi dikelalu laban enti ngarapka ejensi Anti-Dadah Kebangsaann (AADK), Narkotik aja, enda ulih. Sida iya pan enda ulih ba serata endur. Nya kebuah, kerejasama mensia mayuh sigi beguna amat,” ku Abdul Karim.

Ku Abdul Karim, enggau pemansang media rama diatu, chara nyadung dadah ukai baka kelia, ke semina dibai enggau jari nuju orang nya, tang chara diatu moden agi ari nya.

“Chara nyadung dadah tau dibai nengah kurier sereta nyual nengah laman rama ti tebal dipejalai nengah chara nya. Chara kami mutarka pekara tu enda tau enda professionyel mega lalu ukai semina ngarapka PEMADAM, Narkotik tauka AADK tang saup ari mensia mayuh. Dunya udah majak berubah,” ku iya.

Bekaul enggau undang-undang mungkur pengawa salah nguna dadah, Karim madahka perintah benung beratika pekara tu ngambika iya ulih ditagang.

“Bisi sekeda bansa dadah baka gam, sigi nadai undang-undang. Nya alai, kami arapka aum parlimen deka beratika pekara tu laban baka di Sarawak, penanggul nyium bau gam tu balat endar,” ku iya.

Lalu baka nya mega enggau undang-undang ke penyalah nginsap Ganja, ti dirintai ari baruh ‘Schedule drugs’, laban ari baruh penyalah nginsap ganja, sigi udah lama bisi undang-undang ke penyalah nya, ku iya.

“Enti nuan maik lebih ari 200 gram, nya udah ungkup undang-undang 39 (B). Enti ditangkap, nitihka pemayuh dikembuan orang ke mai maya nya, enti lebih ari 200 gram, nya ke disebut Penyadung Dadah sereta tau kena chaj nengah 39(B), ke mai ukum mati,” ku iya.

Ku iya, diatu udah moden, chara orang diatu nguna dadah ukai baka kelia, ke semina bepanggai ba Morphine tauka Heroine tang mayuh agi nguing ngagai ‘Designer’s Drug’ (DD) baka Methamphetamine, Eramin, Syabu, ‘Ice’ ke dirintai ari baruh ‘Schedule Drugs’, muntang agi diproses, muntang dibai kin-kia laban dibungkus mit, enda baka Ganja tauka Heroine.

Baka pil Nospan ku iya, dirintai ari baruh ‘Akta Racun’ ke tau dikena berubat.

“Dadah bansa tu enti di empa kelalu mayuh salah laban tau ngasuh kitai mabuk. Nya alai, sida ke bisi kuasa meri tauka nyual ubat tu, enda tau enda bejejaga. Nya kebuah, patut bisi undang-undang mungkur tu mega, baka sida Farmasi enda tau nyual sengapa, peneka ati tauka peneka sukat…Patut bisi atur kuasa.

“Enti orang nya sakit pan, bisi sukat ke patut, tang kemaya hari tu bisi sekeda farmasi nyual nya tauka orang luar ke nyual Codine (Ubat Batuk), Nospan (semua baruh akta rachun) ke nyual lebih ari takar udah dikira salah…Tu ti dikumbai orang ‘Dadah ke Orang Seranta’, laban ubat bansa tu murah sereta muntang dibeli,” ku iya lalu nambah DD entara dadah ke mar lalu muntang dibeli ulih sida ke beduit.

Iya nandu baru, sekeda dadah bedau dibungkur undang-undang lalu semina Perintah Besai aja nengah Parlimen ulih ngaga undang-undang mungkur bansa dadah nya.

“Tang engka di renggat Perintah Besai, sida iya enda entu beratika penusah nya, laban di semenanjung din, pengawa salah sida iya din mayuh agi ari enggi kitai ke enda balat betapi enggau pengawa salah nguna dadah.

“Dadah ukai penanggul besai di Sarawak,” ku iya.
  

No comments:

Post a Comment