DAP nadai netapka berapa sitak deka dipasuk parti nya maya PRN tu

February 25, 2015

SIBU: Parti Tindakan Demokratik (DAP) nadai netapka berapa sitak DUN ke deka dipasuk dalam pengawa bepilih kunsil nengeri (PRN) ti deka datai tang pengundi ngembuan hak nentuka ni bagi parti ke ulih mai ubah ngagai sida.

Chairman DAP Nengeri Sarawak, Chong Chieng Jen madah, parti nya deka bediri pemadu kurang dalam 30 kerusi DUN dalam PRN ti deka datai tu.

Ku iya, DAP deka nulung ngelempungka tanggungpengawa ke ditapi Parti Keadilan Rakyat (PKR) lebih agi nayup PKR ba sekeda menua pesisir nyengkaum sekeda sitak di kandang mengeri.

30 buah kerusi DUN nya enda nyengkaum 11 sitak DUN baru ke baru diputuska empai lama ke udah, pia ku iya.

“Sebarang parti ngembuan hak nentuka tagit diri sekalika sida ulih menang ba kerusi nya tauka enda.

“Nya hak pengundi nentuka ni bagi chalun tauka parti ke deka dipilih,” ku Datuk Dr Stephen Rundi madah ngagai The Borneo Post, kemari.

Dr Rundi ke mega Menteri Muda Rengka Rama (ELektrik enggau Penyambung) madah munyi nya lebuh ti dipinta meri timbal iya bekaul enggau pemutus DAP ke deka bediri ba 30 sitak DUN beserimbai enggau PRN ti deka datai tu.

Ba PRN taun 2011 suba, DAP semina bediri ba 15 buah sitak DUN ke alai parti nya mujur menang ba 12 sitak DUN.

“Aku enda alit ati meda pemutus ke digaga DAP, nyangka lebih mayuh sitak DUN deka dipasuk parti nya dalam PRN ti deka datai. Parti nya chukup chakah bejalaika pengawa sereta meri tumpu dalam semua sukut pekara dikena napi PRN,” ku Datuk Abdul Karim Rahman Hamzah.

Abdul Karim ke mega Menteri Muda Pemansang Raban Nembiak (Kandang Mengeri) sereta Kaban Kunsil Nengeri (ADUN) Asajaya madahka DAP nyangka deka nambahka lebih mayuh sitak DUN ke deka dipasuk parti nya dalam PRN tu.

“Sekalika parti nya ulih menang ba sitak DUN nya tauka enda, nya bepanggai enggau pengundi.

Aku pechaya ka parti nya chukup chakah bejalaika pengawa ngerapitka kaul enggau rayat di serata endur nyengkaum di menua pesisir sereta di kandang mengeri ke disadang deka dipasuk parti BN,” ku iya.

Kelimpah ari nya, Menteri Muda ba Opis Kepala Menteri (Pekara Islam), Datuk Daud Abdul Rahman madah, bepanggai ba DAP nentuka penyampau sitak DUN ke deka dipasuk parti nya sekali ka 30 tauka 60 sitak DUN.

Dalam PRN sebedau tu, DAP ke mega kaban Pakatan Rayat (PR) bediri ba 49 sitak DUN ke alai PR semina menang dalam 3 buah sitak DUN aja seraya sebuah sitak DUN dipenggi pengari ari chalun BEBAS.

Parti PAS ke diatu enda tampak rita nyengkaum SNAP sereta Parti Cinta Malaysia (PCM) puntan nadai menang sebarang kerusi.

PBB menang kesemua 35 buah sitak DUN, SUPP menang 6 kerusi ari 19 buah kerusi ke dipasuk.

PRS menang 8 kerusi sitak DUN ari 9 buah kerusi ke dipasuk seraya SPDP menang 6 kerusi ari 8 kerusi DUN ke dipasuk. -TheBorneoPost