Friday, 22 February 2013

BB1M ke peransang nembiak universiti nyulut dalam pelajar: Karim


KOTA SAMARAHAN: Sepenyampau 13,000 iku nembiak Universiti Malaysia Sarawak (UNIMAS) deka nerima Baucer Bup 1Malaysia (BB1M) ti diagih enggau tuju meransang nembiak universiti nyulut dalam pengawa pelajar.

Menteri Muda Pengawa Berumah Abdul Karim Rahman Hamzah madahka bantu nya disedia perintah ngambika tau ngelempungka belanja sida (nembiak universiti) bebelika bup.

Ku iya, perintah semampai meratika pemerat pengawa pelajar nembiak di universiti ke alai bantu BB1M tau bendar meransang sida iya teulihka pemujur.

“Mayuh macham bantu udah disediaka perintah ungkup pemaik enggau pengelantang rayat.

BB1M diagihka ngagai semua nembiak universiti ngambika ulih meransang sida nyadi mensia ti beguna jemah.

“Ba taun ke udah (2012), bantu BB1M tu keterubah iya disadung lalu dilanjarka ngagai taun 2013 sebaka enggau program bantu rayat ke bukai,”ku iya.

Iya mansutka jaku tu ba pengerami ‘simbolik’ nyerahka BB1M ngagai 10 iku pengari nembiak UNIMAS ti diatur di Student Pavillion kemari.

Iya ke mega Menteri Muda Pemansang nembiak Sarawak madahka semua bantu nya diberi ukai ketegal ti deka matak sukung ari rayat ngagai perintah Barisan Nasional (BN).

“Taun tu (2013) kedua kali kitai udah nyadung BB1M ngagai pelajar universiti sereta bantu bukai ke nyengkaum BR1M ungkup pemaik semua.

“Program bantu tu ukai dikena matak undi rayat kelebih agi maya bepilih nyau majak semak,”ku iya.

Ungkup taun tu, penyampau BB1M udah ditikika ngagai RM250 enti dibandingka enggau semina RM200 ba taun 2012 iya nya niki 25 persin.

Sepenyampau RM3.25 juta diungkupka ngagai 13,000 nembiak UNIMAS taun tu lalu deka berengkah disadung sehari tu (22 Februari).

Bela datai Mandal Canselor UNIMAS Prof Datuk Dr. Khairuddin Ab Hamid.
   

No comments:

Post a Comment

Note: only a member of this blog may post a comment.