Ari pansik MARDI padi tu ulih ngeluarka asil ti mayuh sereta tau diketau dalam timpuh ti pandak: Karim
KOTA SAMARAHAN: Orang bumai diansak nanam padi varieti MR219 ti ulih ngeluarka asil ti mayuh sereta tau diketau tumu agi.
Chairman Komiti Pemansang Bumai Betanam Kandang Parlimen (MPPP) Samarahan Abdul Karim Rahman Hamzah madah, tebal agi orang bumai menua tu semina ulih bumai sekali setaun.
Ku iya, paung varieti MR219 ti ditemu asil pansik Institut Pemansik enggau Pemansang Betanam Betupi Malaysia (MARDI), ulih ngeluarka padi ti mayuh sereta dikereja tauka diketau dalam timpuh ti pandak.
“Tu ulih muka runding kitai senentang chara baru bumai alai kitai semina ulih bumai sekali setaun aja diatu.
“Tang bekenaka paung MR219, pengawa bumai semina dikereja dalam timpuh tiga bulan aja lalu tau diketau udah nya,”ku iya.
Iya mansutka penerang nya ba pengerami ngagihka paung varieti MR219 ngagai 1,461 orang nerima ba Dewan Suarah Kota Samarahan kemari.
“Enti sema kitai suah teulihka asil satu tauka dua tan ungkup sehektar tanah, tang paung tu tau ngemansutka asil ngagai dua tauka tiga kali lipat ari penyampau ke udah,”tandu iya.
Karim ke mega Menteri Muda Pemansang Nembiak sereta Menteri Muda Pengawa Berumah madah, paung baru tu ulih ngangkatka penatai pemisi orang bumai.
“Tu pengawa ti diadu enggau juluk deka ngangkatka ekonomi kelimpah deka ngubah runding rayat senentang chara baru ti tau mai pemansang,”ku iya.
Kelimpah ari nya, kitai mega ulih bekenaka tanah enggau chara ti betul lalu mulaika penguntung ngagai semua.
“Engka kitai ulih bumai dua kali setaun lalu tu siti chara ti betul bekenaka tanah,”ku iya.
Bela datai sapit Residen Samarahan Abdullah Upang, Pemesai Betanam Betupi Samarahan Rabaitul Adawiyah Abdullah sereta orang bukai.
No comments:
Post a Comment