SIBU: Bumai betupi diatu udah begamal baru seraya pekebun moden ulih ngeraup untung besai enti sida sanggup ngereja tanah.
Sapit Menteri Pemansang Orang Ubas Abdul Karim Rahman Hamzah madahka pengawa bekebun diatu udah berubah ari menya.
“Kitai ulih mujur nyadi pekebun baru nyema sanggup masuk bidang tu. Pengawa betanam betupi ulih meri penguntung,” ku iya nengah pesan jaku pandak (sms).
Karim, ti mega Kaban Kunsil Nengeri Asajaya ditanya sekalika diatu raban nembiak deka agi gawa dalam airkon ari ke ngereja tanah.
Sapit menijing direktor KTS Group of Companies, Temenggong Vincent Lau Lee Ming udah nebah penemu ba jaku iya minggu nyin tadi ba “Young Potential Development Program for Plantation Management”.
Karim setuju ba penemu nembiak deka agi gawa di opis ari ke neranting tulang ngelaban panas.
“Gaya pengidup ke diatu, sereta jalai apai indai enggau ketuai menua meri timbang ba penyulut akademik nyadika kayu depa pemujur dalam pengidup udah nempa anggap pengawa betanam betupi nya karier ke kurang setindit.
“Mayuh orang enggai mekuh pengawa tu lalu nembiak baru enggai nyempil diri ba pengawa nya nyadi karier sida,” ba timpai iya.
Kaban Kunsil Nengeri Nangka Dr Annuar Rapaee besetuju madah, nembiak diatu deka agi gawa ba endur ke nyamai.
Dr Annuar madah, enda senang deka niki pangkat nyema gawa ba opis.
Tang ba bumai betaun, untung bepangggai ba pemeras diri ke gawa. Nya alai asil tau nambah jampat enti gawa bebendarka agi, ku iya.
No comments:
Post a Comment