KUCHING : Opis Menteri Pengawa Berumah nengah Opis Pemansang Pengawa Berumah (HDC) kala merambu deka ngaga 20 pintu Rumah Mesra Rayat (RMR) ba taba Skim Pembesaran Kampung Meludam, ba Lot 2001-2380, Blok 1, Triso Land District, Maludam. Penulung Menteri Pengawa Berumah enggau Pemansang Raban Nembiak (Bandar) Datuk Haji Abdul Karim Rahman Hamzah madah, taja baka nya pengudah diperesa HDC taba ke deka endur ngentak rumah nya (Skim Pembesaran Kampung Meludam) enda manah endur nirika rumah laban tanah ba endur nya mudah kena ampuh bah.
"Nya alai, raban HDC udah minta taba baru enggau chara betulis ngagai Opis Tanah enggau Survei Betong palan ke lebih manah iya nya ba Lot 1986-2010, Blok 1, Triso Land District, Meludam. "Peminta nya benung diperundingka Opis Tanah enggau Survei Betong, " ku iya.
Iya madah munyi nya ba hari keempat Aum Kedua Renggat Ketiga Kunsil Negeri (DUN) Sarawak Ke-17 ke diatur ba Opis DUN Baru, Petra Jaya ditu, kemari (Hari Empat). Udah nya, Karim madah ungkup RMR Skim Pembesaran Kampung Lingga, Sri Aman raban HDC udah bejalaika pengawa nimbuk tanah ba 41 buah lot. Ari 41 buat lot nya, ku Karim bisi 15 pintu RMR tembu digaga sereta udah diberi ngai bala pesereta ke bisi ngambi bagi nitihka renggat keterubah .
"Nengah renggat kedua, HDC benung merambu deka ngagai 26 buah laluh RMR ke agi tinggal. Enggau nya, HDC bisi minta agih belanja tambah dikena nyediaka perengka rama ngagai Opis Negeri ngambika diperunding. "Nya alai, projek ba renggat kedua deka berenkah dipejalaika enti sema agih belanja nya udah bulih pemendar," ku iya.
Iya madah munyi nya lebuh nyaut tanya Hajah Simoi Peri (BN-Lingga) bekaul enggau kemaya projek pemansang RMR dipejalaika ba Kampung Meludam enggau pengawa ngaga renggat kedua projek RMR ba Kampung Lingga. Berebak enggau nya, Simoi bisi nyadaka tanya tambah bekaul enggau kriteria orang ke deka minta RMR enggau pelin rumah ke bisi digaga perintah naka ke diatu.
Karim madah, entara kriteria ke udah diletak HDC endur ngulih peminta RMR tu iya nya meseti peranak menua Malysia, beumur 18 ngagai 65 taun, taja baka nya peminta ke beumur 45 ngagai 65 taun sida meseti meri penama kedua beumur entara 13 ngagai 18 taun.
Udah nya, penatai pemisi tuai bilik meseti enda ngelui RM3000 sebulan, udah kahwin, enti apai tunggal tauka indai tunggal sida nya meseti diau sebilik enggau anak kelimpah meseti ngembuan taba tanah ke endang dipenggi diri empu. Berebak enggau nya mega, naka ke diatu semina siti aja pelin RMR disediaka HDC iya nya dalam rumah nya ngembuan dua bilik tinduk enggau dua bilik mandi," ku Karim.
No comments:
Post a Comment