Thursday 21 November 2013

RM487,298 dibayar ngagai 200 peranak ungkup projek Jalai Mangut-Tuie-Supa

November 21, 2013

KUCHING: Sepenyampau RM487,298 dibayar ngagai 200 iku peranak ungkup bayar pampas tanah dikena ngaga projek Jalai Mangut-Tuie-Supa, ku Menteri Muda Pengatur Pemansang Pengeraja Asal Datuk Mohd Naroden Majais.

Iya madah 200 iku peranak tu sida ke beempu Tanah Hak Adat Bumiputera (NCR) ke sah lalu pengawa mayar pampas udah tembu ba taun 2010.

“Naka kediatu, pemujur fizikal projek iya nya 87 persin nitihka timpuh, lalu dipelabaka tembu ba Januari taun nyin ila,” ku iya maya nyaut tanya Mohammad Razi Sitam (BN-Saribas) ba Aum Kunsil Nengeri, nengeri Sarawak ditu, kemari.

Lebuh nyaut tanya Ripin Lamat (BN-Lambir), bisi ke enda perintah merambu ngungkupka lot rumah semina ngagai raban nembiak aja, Mohd Naroden madah perintah bedau bisi perambu baka nya.

Kelimpah ari nya, Menteri Muda Pengawa Berumah Datuk Abdul Karim Rahman Hamzah madah, nyentuk ke 6 Nov tu tadi, sepenyampau 58,766 peminta udah diterima ungkup semua projek rumah ungkus murah enggi Gerempung Pemansang Pengawa Berumah (HDC) di serata Sarawak.

“Nitihka persin peminta, Kuching ngerikutka 51 persin (%), Sibu (13%), Samarahan (12%), Bintulu (5%), Miri enggau Sarikei sama ngerikutka 4.6 persin ungkup projek rumah ungkus murah HDC,” ku iya maya nyaut tanya Martin Ben (BN-Kedup).

Maya nyaut tanya Razaili Gapor (BN-Beting Maro) ke deka nemu enggau silik, bisi ke enda perintah merambu ngemansangka baru rumah rayat di Pusa, Abdul Karim madah, HDC diatu benung merambu pekara nya.

“Penemuai enggau pansik udah dipejalaika lalu pelin ngemansangka baru projek nya dipelabaka tembu lalu deka dianjung ngagai piak ke bekuasa ba pun taun tu ila.

“Projek nya ke nyengkaum rumah rayat dipejalai nitihka rega pasar asil ari pansik digaga HDC,” ku iya.

Ku iya, nengah pelin nya, penanggul ke nuntung projek nya ulih diputarka enggau manah. — Bernama
 

No comments:

Post a Comment