Rega rumah ditentuka ari peminta pasar – Karim

September 6, 2013

  

KUCHING: Rega runmah ke niki di negeri tu endang ketegal peminta pengguna tauka peminta pasar ke makin tinggi. Penulung Menteri Pengawa Berumah, Haji Abdul Karim Rahman Hamzah madfah, chara realiti nya taja pan rega minyak niki, ukai reti nya ketegal rega rumah niki, taja pan semina mimit aja pekara nya bekaul enggau rega rumah. 

"Faktor pugu nentuka rega rumah niki laban peminta pasar, chunto iya, di Bintulu kemaya hari tu rega rumah enggau tanah di menua nya pemadu tinggi dibanding enggau tempat bukai ke benung mansang," ku iya.

Iya bejaku munyi nya dalam aum media selepas pengawa bejadi Projek Fasa Enam enggau Tujuh Dusun Bayu di Pusat Konvensyen Borneo Kuching (BCCK) ditu, kemari. Ku Karim, rega sewa sebuah rumah di Bintulu mega ulih datai ngagai RM2,000 sebulan, nya alai perintah negeri selalu ngenyampatka pemendar pengawa ngaga projek rumah di Bintulu kena namopung peminta pasar di menua nya. 

Dalam pekara nya, kena nentuka rayat ke kurang penatai pemisi ulih meli rumah, perintah negeri ngaga mayuh agi rumah rega murah sereta rumah rayat miskin enggau penyampau sewa murah. 

Taja pia, Chairman Borneo Development Corporation (Sarawak) Sdn. Bhd., (BDC) nya madah, rega sebuah rumah begantung enggau pemansang di sekeda pelilih menua.

"Rega rumah di Dusun Bayu ba Demak Laut udah ditetapka sebedau polisi pengawa berumah dipejalaika perintah lalu iya nadai bekaul enggau polisi nya. 

"Tu laban, setiap tempat pemansang dalam atur perintah endang nyengkaum ngaga rumah kos baruh lalu aku pechaya tempat bukai deka nggaa rumah kos baruh deka digaga," ku iya sambil madahka rega rumah di Dusun Bayu belabuh ari RM380,000 ngagai RM500,000.

   

Dalam pekara bekaul enggau nya, ku Karim, anak syarikat perintah negeri (GLC) nya udah ngaga pansik enggau tinjau di tempat ke bukai lalu udah meli tanah di Kapit kena alai ngaga projek rumah dudi ila. 

"Kitai enggai ke sekeda pelilih menua di negeri tu tetinggal ari segi arus pemansang, nya alai kitai udah ngatur pelan kena ngemansangka projek berumah di Kapit dudi ila," ku iya. Karim mega madah, Kapit agi bedau ngembuan rengka logistik ke manah, sereta enggau jalai raya ke benung digaga diatu.

Sama datai ngulu pengerami nya,Kaban Lembaga Pengarah BDC, Datu Haji Wan Kassim Tuanku Zubir enggau General Manager BDC, Dr. John Panil.