KUCHING: Bank di menua tu dipinta nendurka atur ngemendarka loan ngagai peranak menua ke deka nginjau duit meli rumah.
Menteri Muda Pengawa Berumah Datuk Abdul Karim Rahman Hamzah madah, kitai minta bank enti ulih nendur mimit ngemendarka loan ungkup pemeli rumah ti begaji mit.
“Taja pan ari sepiak perintah, baka Rumah Mampu Milik (RMM) rega ngaga nya entara RM140,000 ngagai RM150,000 tang rega ti dijual Perintah semina urung RM50,000 ‘intermediate’ tauka RM59,000 ba ujung.
Orang ti begaji mit deka meli rumah RM50,000 nya pan enda ulih, ngambi duit ari Opis KWSP, laluh nginjau ari bank. Taja udah dikemendar ari opis kami tang lebuh minta loan ari bank, peminta sida ditulak.
Kitai ngarapka bank bisi penyinu nendurka atur nya mimit, beri lunggar mimit ngambi tau ngelantangka sida ke bepenatai pemisi mit,” ku Abdul Karim, pengudah bejadika laman web Hitmenten ba sebengkah hotel ditu, ensana.
Ngenang pasal Chukai Barang enggau Servis (GST) iya madah, rega rumah endang niki ninting taun.
“Kitai bedau ngasaika rega rumah nurun, lalu ba sekeda endur rumah nya jauh mar ari tempat bukai. Tu ketegal kuasa pemeli jauh besai ari penyampau rumah ke bisi dijual.
Abdul Karim ti mega Menteri Muda Pemansang Nembiak madah, taun tu rega rumah dipelaba niki urung sepuluh peratus.
“Bepun ari pemar ditambah GST, manah agi orang ke bisi ati deka meli rumah nyimpan duit sida dulu, ari nya rega rumah tau nurun baka ke kala nyadi di Australia,” tandu iya.
No comments:
Post a Comment