Thursday, 7 August 2014

Semua ejensi penerit undang-undang patut ngemeratka agi bansa ukum ti dipejalaika

August 7, 2014

KUCHING: Ejensi ari baruh Opis Kandang Menua patut beratika kes bunuh sereta pengawa belaya ke seruran nyadi di nengeri tu diputar nengah undang-undang ke terit agi lalu ukai semina ngudahka kes nya enda diukum setipak enggau penyalah ke digaga orang nya.

Menteri Muda Pemansang Nembiak (Nengeri) Datuk Abdul Karim Rahman Hamzah madah beratika kes bunuh ti bisi nyadi dini hari kemari, alai dua iku nembiak universiti ari United Kingdom dibunuh seraban orang enda entu jauh ari sebuah hotel mit di nengeri tu, ku iya, kes bansa tu patut nyadika lalau, atur undang-undang enda tau enda diteritka, lalu ukai semina ngudahka kes baka nya aja.

“Orang ke munuh nya patut diberi ukum berat, polis pan anang semina ngudahka kes bansa nya aja. Kitai suah endar udah ninga kes bunuh, belaya ngena senyata tajam, lalu enti diperatika nyau majak nambah. Kes ke nyadi dini hari nya, sebengkah kes ke udah suah didinga kitai tang taja pan orang nya kena tangkap, kadang-kadang sida tu dilepas baka nya aja, dijamin lalu udah nya, maya patut ngenataika diri ngagai kot, sida iya lari, enda temu tunga agi.

“Ni maya kitai deka ngemunaska orang bansa tu ari pasar-pasar kitai. Tangkap sida tu lalu beri ukum ke berat, jil dalam timpuh ke panjai,” ku Abdul Karim.

Iya nandu baru, bedau lama tu tadi, kes ke nyauka sebaka, nyadi ba nembiak di Samajaya, ba rumah jaga alai seraban orang ngena mutosikal mantap nembiak nya di rumah jaga tang gambar sida iya bisi kena ambi CCTV.

“Pengawa bansa nya kelalu jai, lalu orang ke ngereja pengawa salah nya bedau ditangkap. Bakani ku polis sereta kot kitai enda ulih ngemutarka kes nya, baka kes nya enda berat ba sida iya?,” tanya iya.

Pengawa munuh dua iku nembiak dini hari nya kemari, enggau sekeda kes bukai (belaya, bebunuh) meri malu ngagai Sarawak sereta Malaysia.
 
“Dua iku nembiak nya ke bejalai di nengeri tu ngumbai diri deka belelak, tang kena bunuh. Ijinsi Opis Kandang Menua enda tau enda ‘dani’, lalu kemutarka pengawa sida iya enggau jampat. Kemunaska semua orang bansa tu ari jalai, sereta pasar kitai. Anang ngaga jalai tauka pasar kitai nyadi endur bebunuh.

“Sapa-sapa ke ngereja pengawa salah tu enda patut segau-segau di jalai-jalai kitai,” ku iya.

No comments:

Post a Comment

Note: only a member of this blog may post a comment.