Peminta enda diterima ketegal penerang enda sebaka sereta nadai pengamat penerang ke tegap

May 10, 2014

KUCHING: Opis Pengerejister Bansa (JPN) enda ngemendarka peminta laun ngerejista surat pengada enggau MyKad seseiku, ketegal penerang ke enda sebaka sereta nadai pengamat penerang ke tegap.

Pekara nya diterangka Menteri Muda Pemansang Nembiak, Datuk Abdul Karim Rahman Hamzah lebuh ti nyaut tanya ari Johnnichal Rayong Ngipa (BN-Engkilili) ba aum Kunsil Nengeri kemari.

Bekaul enggau peminta ari sitak Engkilili, sepemanjai taun 2013 bisi 11 peminta laun ngerejista diterima ari sitak nya, lalu empat iti ari nya ditulak ketegal penerang ti enda sebaka sereta nadai pengamat penerang ke tegap sentang pengada peminta, ba opis pelilih mit menua, pia ku iya.

Ku Karim, sepemanjai taun 2013 bisi lapan peminta laun ngaga kad MyKad diterima ari pelilih mit menua Engkilili tang semua nya udah dikemendarka.

“Kebuah peminta laun ngerejista (surat pengada enggau kad pengelala) enda dikemendarka laban, penerang ti enda sebaka sereta nadai pengamat ke tegap pasal peminta nya.

“Naka bulan Mac 2014, bisi lima iti peminta laun ngerejista pengada diterima ke alai tiga ari peminta nya benung diperundingka.

“Lalu naka bulan Mac taun tu, semina seiti peminta laun pengada rejista diterima sereta dikemendarka,” pia ku iya.

Ku Karim, orang ti laun ngaga surat pengada enggau kad pengelala bisi dipinta mayar kompaun enggau bayar kena ngaga nya kededua nya.

Nembiak ke umur 12 taun, enti enda ngaga MyKad dalam timpuh 30 hari berengkah ari iya umur genap 12 taun, dipinta mayar kompaun enggau bayar ngaga RM10.

peminta laun ngejista MyKad ungkup nembiak ti udah manggai umur 16 taun tauka lebih, nadai kala bisi MyKad sereta diau di Malaysia sekumbang timpuh nya mega dipinta mayar ngaga MyKad (RM10).

“Nembiak ti beumur 12 taun nyentuk ke 13 taun dipinta mayar kompaun RM1, 13 nyentuk ke 14 taun (RM2), 14 nyentuk ke 15 taun (RM4), 15 nyentuk ke 16 taun (RM6).

“Bayar rejista laun ngaga MyKad ungkup rayat Malaysia ti beumur 19 taun, tang bedau manggai 22 iya nya RM22, ke beumur 22 taun tang bedau manggai 25 taun (RM60), 25 taun tang bedau manggai 28 taun (RM80), 28 taun tang bedau manggai 31 taun (RM100), 31 taun tang bedau manggai 34 taun (RM120), 34 taun tang bedau manggai 37 taun (RM140), 37 taun tang bedai manggai 40 taun (RM160) enggau orang ti beumur ngelui 40 taun dipinta mayar RM200,” pia ku iya nyaut tanya tambah ari Rayong sentang penyampau bayar ketegal laun ngaga MyKad.