Gelar nya sebengkah kelai sereta basa ngagai Taib

May 27, 2014

“Kami ngajihka Tun Taib gerai belama berindik ari pengawa nerima gelar pengabis tinggi tu.” Tuan Haji Abdul Karim Rahman Hamzah

PATUT PENGGI NUAN: Menteri Besai Datuk Seri Najib Tun Razak (tiga ari kiba) enggau bini iya Datin Seri Rosmah Mansor (dua ari kanan) betundi enggau Tuai Pemegai Menua Sarawak Tun Abdul Taib Mahmud (empat ari kanan) sereta bini iya Toh Puan Ragad Kurdi Taib (tiga ari kanan) pengudah atur pengawa Nerima Gelar ‘Tun’ ari Yang Dipertuan Agong di Istana Negara, Jalai Duta di Kuala Lumpur kemari. Bela bisi ayan dalam gambar nya (ari kiba) Kepala Menteri Sarawak Tan Sri Adenan Satem, Sapit Menteri Besai Tan Sri Muhyiddin Yassin enggau bini Kepala Menteri Sarawak Puan Sri Jamilah Anu. — Gambar Bernama

KUCHING: Semua pemesai parti politik nengeri tu ngasaika gelar ‘Tun’ ti diungkup ngagai Tuai Pemegai Menua (TYT) Yang Dipertua Negeri Sarawak Pehin Sri Abdul Taib Mahmud endang setipak sereta patut diberi ngagai iya.

Gelar nya sebengkah kelai sereta basa ngagai Taib, udah lima dekad megai nengeri tu, nyadi Kepala Menteri, nyadi Kaban Parlimen sereta Menteri ba renggat Perintah Besai, lebih agi dalam politik pemansang nengeri Sarawak.

Ngarika Parti Rakyat Sarawak, presiden parti nya, Tan Sri Dr James Masing madah Taib endang patut nerima gelar nya, beratika sukung sereta pemansang ke diatur iya dalam kandang 50 taun ngangkatka menua tu dalam Malaysia.

“Gelar nya patut lebih agi pengawa iya dalam kandang 50 taun ke udah ngangkatka pengawa pemansang nengeri tu. Tun Taib entara ketuai ke jarang ditemu di Malaysia, ke udah gawa bebendar ke menua tu,” ku Masing ti mega Menteri Pemansang Tanah Sarawak.

Maya nimbal jaku Masing, seiku pemesai parti ti baru ditumbuh, Datuk Peter Nansian ari Parti Tenaga Rakyat (TERAS) sama sepenemu enggau Masing, madahka gelar nya patut lebih agi pengawa ke udah dipejalaika Taib maya timpuh ke lama, lebih agi ngangkatka nengeri Sarawak ngagai renggat baka ke diatu.

“Iya (Taib) udah ngubah Sarawak nyadi sebuah nengeri baka ke dipeda kitai diatu. Sarawak udah nyadi sebengkah nengeri ka mansang enti dibanding enggau sekeda nengeri di Malaysia diatu.

“Kelimpah ari pemansang ekonomi, iya mega udah mai mayuh ubah pemansang bukai di nengeri tu seraya ngemeratka penyerakup entara pupu raban bansa. Iya (Taib) patut diberi basa ngemesai nya. Kami ngajihka iya gerai belama,” ku Nansian ti mega Menteri Muda Pemansang Industri Sarawak.

Menteri Muda Pengawa Berumah Datuk Abdul Karim Rahman Hamzah madah gelar ‘Tun’ nya setipak enggau pengawa pemansang ke mayuh udah diatur Taib, ukai semina di Malaysia tang lebih agi di Sarawak ari taun 1960 kelia, ku iya.

“Nyadi rayat Malaysia ke diau di Sarawak, kami berasai temegah ke gelar ti diberi Agong ngagai iya (Taib) ke endang patut. Pengawa ke udah digaga iya ke Malaysia nadai banding lebih agi iya empu udah gawa di baruh lima (5) Menteri Besai nengah kapasiti ti diberi ke iya.

“Kami ngajihka Tun Taib gerai belama berindik ari pengawa nerima gelar pengabis tinggi tu,” ku Karim.