Sebengkah komiti ditumbuh ngambika nyerenih ordinan pengawa berumah

by Chris Bishop.

Posted on March 19, 2013, Tuesday

KUCHING: Ordinan Pen­gawa Berumah Sarawak deka diserenih ngambika tau dikemanah sereta seti­pak enggau pengidup sereta trend kemayaharitu.

Perintah nengeri numbuh­ka sebuah komiti teknikal ti betuaika Menteri Muda Pen­gawa Berumah Abdul Karim Rahman Hamzah bejalaika pansik senentang undang-undang pengawa berumah renggat nengeri.

Entara pekara ti deka dipe­jurai komiti tu iya nya ngung­kupka undang-undang ke mungkur penumbuh komu­niti ti diau dalam kandang ti bepagar ke nyengkaum rumah flet sereta lisin, ku Menteri Pengawa Berumah Datuk Amar Abang Johari Tun Openg.

“Mayuh pekara ti enda diperatika enggau silik dalam pemansang pengawa berumah di Sarawak. Karim deka ngulu­ka komiti teknikal lalu bejalaika pansik senentang nya.

“Aku mega deka berand­auka pekara tu enggau Opis Tanah enggau Survey, Opis Menteri Pengatur Pengeraja Asal sereta orang ke megai undang-undang (Dewan Perundangan) ngambika tau dibai ngagai kabinet lalu dipejurai.

“Enti bisi nerima pemendar ari raban ngagai Aum Kunsil Nengeri (DUN),” ku iya.

Iya mansutka jaku tu ba sebengkah aum pengarang berita pengudah bejadika Pengerami Ngemunka Projek Pengawa Berumah Vista Per­dana Fasa 2, Miri ditu malam, ensanus.

Dulu ari nya, ba jaku iya Jo­hari madah, Kepala Menteri udah ngemendarka pengawa nendurka premium tanah nitihka rega sabsidi maya ke diatu.

“Kitai udah berandauka pekara tu begulai enggau Kepala Menteri lalu deka dipejalai dalam awak ke se­mak,” ku iya.

Ngenang senentang pemun projek malam nya, Johari madah, projek didirika di­palan ti chukup manah iya nya di kandang endur Permai Jaya ti semampai dipansa orang ari Brunei kelimpah ari ti besemak enggau Curtain Universiti.

Projek renggat kedua nya mungkur 789 buah rumah ke alai Syarikat Perumahan Negara Berhad (SPNB) deka ngaga rumah nya berenggat.

Projek Vista Perdana Fasa Dua, Miri nyadi palan beru­mah sepemesai 296 ikar lalu nyadi sebengkah ari projek ulih diempu ti dikemansang SPNB.

Bela bisi ngulu atur pen­gawa nya, Sapit Menteri Sains, Teknologi enggau Inovasi Datuk Fadillah Yusof, Chairman SPNB Datuk Ir. Wira Idris Haron, Direktor Atur Kereja SPNB Dato Dr Sr Kamarul Rashdan Salleh, Menteri Muda Pengawa Berumah Abdul Karim Rah­man Hamzah enggau Datuk Francis Harden sereta ADUN Pantai Damai Dr Abdul Rah­man Junaidi.