KUCHING: Radio Free Sarawak (RFS) diatu udah bisi menyadi ke mega sebuah stesyen radio ke dikumbai Radio Free Malaysia (RFM), udah berengkah naburka berita malam ensanus (25 March).
Menteri Pemansang Tanah, Tan Sri Dr James Jemut Masing (gambar) enda tekenyit ati enggau penumbuh stesyen radio nya sebedau pengawa bepilih besai tu.
Taja pia, iya arapka stesyen nya enda ngena arus nya bebulaka rayat.
“Kala ke diatu sida bisi arus penabur, aku nadai mayuh jaku tang semina ngelalau RFS, RFM enggau Radio Kenyalang, arus radio nya ukai dikena naburka pemula ngagai rayat,” pia ku peresiden Parti Rakyat Sarawak (PRS) nya.
Berebak enggau nya, kaban kunsil tinggi Parti Pesaka Bumiputera Bersatu (PBB), Abdul Karim Rahman Hamzah madah, stesyen radio nya dipejalaika nengah chara belalai, nya semina deka ngeruga pengelikun, pengelantang rayat enggau penegap menua.
Iya minta raban ke bekaul enggau pekara nya baka Opis Menteri Dalam Nengeri (KDN) enggau Kunsil penyambung Enggau Multimedia Malaysia (MCMC) ngemeratka pekara tu sereta nyekat semua stesyen radio nya.
“Nama kebuah muntang amat sida ngepunka Radio Free Malaysia ti bejaika perintah? Enti menua bukai ulih nyekat stesyen radio ti dipejalaika nengah chara belalai, nama kebuah menua kitai enda ulih?,” ku iya.
“Pengawa numbuhka stesyen radio semak pengawa bepilih tu deka meri awak ngagai sekeda NGO ba tikas antarabansa enggau ari menua tasik malut diri ba politik menua kitai. Pekara tu sama reti baka ketuai parti penyakal nyual diri ngagai ijin ari menua luar kena ngulihka kuasa,” ku iya.
Pengawa numbuhka RFM udah dipansutka penengkebang RFS, Clare Rewcastle-Brown ba sebengkah penerang ke dipansutka sebengkah surat kabar, ensanus.
RFM nyelai ari RFS ke ditaburka nengah gelumbang angin pandak ke tebal agi dalam Jaku Iban, tang RFM ditaburka ngena Bahasa Malaysia nengah medium wave, 1359kHz ninting malam berengkah ari pukul 9 nyentuk ke pukul 11 malam, jam Malaysia.
Program ti keterubah ditaburka RFM iya nya, siti intebiu enggau ketuai penyakal, Datuk Seri Anwar Ibrahim.
Ku Rewcastle-Brown, RFM ditabur ari luar menua Malaysia laban perintah besai enggai meri sida lisin.
“RFM nyendiaka pelasar endur mantaika penemu ke nadai diserenih ari penyakal,” ku iya.
Iya mega madah, bisi seraban pemansut enggau penabur berita ari menua Malaysia udah datai kitu begulai enggau kami bejalaika pengawa lalu sida diungkupka dua jam sehari bejalaika program ungkup peninga ke nadai ba radio tauka TV di Malaysia.
“Barang sapa ke deka nemu polisi parti penyakal sereta penemu sida, diatu tau ningaka program kami nengah radio di Malaysia. Mensia mayuh ke nadai internet pan bisi peluang ningaka kami,” ku iya.
Iya mega madah, RFM nadai penanggul intebiu sesapa ari BN ke bisi ati pansut nengah program sida. “Taja pia, sida bela beratika pekara nya dulu laban stesyen radio tu dipejalaika nengah chara belalai,” ku iya.
RFM mega bisi muka arus telefon nengah toll free ngambika bala peninga ulih masutka penemu sida nengah lumur 1-800-815-309, sereta mega tau ninggalka pesan nengah lumur nya sebarang maya.
Program sida mega ulih didinga nengah website www.radiofreemalaysia.org.
No comments:
Post a Comment