KUCHING: Kaban Kunsil Pemadu Tinggi dalam Parti Pesaka Bumiputera Bersatu (PBB) ti mega nyadi Menteri Muda Pengawa Berumah enggau Menteri Muda Nembiak (Nengeri) Abdul Karim Rahman Hamzah nyukung Ketuai Nembiak PBB kediatu, Datuk Fadillah Yusuf enti sema iya deka bediri ngerebut kerusi nya baru maya Aum Besai PBB ti deka diatur kena 18-20 Oktober tu ila.
Abdul Karim madah iya nadai ati deka enggau bediri ngerebut penuduk nya laban ku iya, berita ke ditabur orang madah iya deka enggau ngerebut kerusi nya, semina berita selebubu ngapa aja.
“Ungkup aku ke penuduk nya udah lepas, enti bisi pan berita ke madahka aku ka enggau bediri ngerebut kerusi Ketuai Nembiak, nya semina berita selebubu aja.
“Kami di PBB bisi ketuai nembiak ke chukup bepeneleba, baka Datuk Fadillah, iya chunto tuai nembiak ke manah, ukai ketegal aku nemu iya deka bediri baru nyadi Ketuai Nembiak tang nyangka iya deka bediri ngerebut kerusi nya ila,” ku iya.
Iya madah baka tu lebuh dikerandau, pengudah bejadika atur pegawa Aum ‘Perwakilan’ pampang Tiga Taun Sekali (TGM) N13 Batu Kawa di Hotel Rajah Court Regency ditu, kemari.
Iya madah, ke diatu entara opis pampang parti PBB di serata menua Sarawak, pengawa bepilih dalam pampang opis nya empu bejalai enggau manah, sereta nadai betapi enggau sebarang penanggul.
“Amat bisi sekeda pampang opis PBB bisi ubah mimit, tang nya sigi gaya adat demokrasi.
Ba renggat menua ku iya, nadai ubah besai deka nyadi laban Sarawak baru udah bejalaika pengawa bepilih besai parlimen lalu dua taun agi nyangka pengawa bepilih besai menua.
“Enda manah enti timpuh nya kelalu semak.
Enti bisi pan besengki enggau pangan diri dalam parti, iya tau ngasuh parti nya bepechah, lalu enti udah bepechah, lama nganti iya pulai manah baru,” ku iya.
No comments:
Post a Comment