KUCHING: Sekeda rumah panjai ke enda setuju enggau tukuh ke digaga Opis Pemansang Pengawa Berumah (HDC) tau madahka tukuh ti dikedeka sida.
Menteri Muda Pengawa Berumah, Datuk Abdul Karim Rahman Hamzah madah, enti sema tukuh ke digaga HDC bisi penanggul sereta enda baka ti dikedeka sida, pekara nya patut dipejuraika.
“Enti bisi penanggul, pekara nya ulih diperunding. Penemu kami, asal iya enda lari ari tukuh asal rumah panjai nya empu.
“Rumah panjai patut ngembuan tukuh ke mandangka pengidup begulai…bisi ruai, tanju, tempuan, bilik, dapur. Kelebih agi baka ruai alai mayuh ngatur aktiviti. Tang enti bisi timbal madahka ruai ke ditukuh HDC nya kelalu mit, pekara baka tu patut dipejuraika,” ku Abdul Karim seraya madah, orang ke ngempu tanggungpengawa ngaga rumah panjai baru tu, Menteri Muda Pengawa Berumah enggau Pemansang Menua Pesisir, Datuk Francis Harden.
Lalu baka nya mega enggau bilik, ku iya, laban bilik rumah panjai enti nitih sigi besai laban nitihka pemayuh tubuh sesepintu.
“Enti enda salah aku pemesai bilik nya kada enda urung 700 kaki besegi, lebih kurang baka Rumah Mesra Rakyat (RMR), tang taja pia, agi bisi tanah ke belakang rumah panjai nya, enti sema sida iya deka ngaga besai agi.
“Enti kitai meda, maya ngemesaika rumah panjai, ke belakang kin ke digaga sida iya besai agi,” ku iya.
“Kebuah baka nya ngambika sida iya enda ngelui ari tikas pemesai tanah ba sesepintu,” ku iya lalu nambah rumah panjai di menua tu nadai bepala tanah laban iya baruh kuasa semua ke ngempu rumah panjai nya sereta semina deka diberi siti pala aja mungkur semua pintu rumah panjai nya.
Kelimpah ari nya mega, Abdul Karim madah, dalam pengawa ngaga rumah panjai, opis menteri nya mega deka bejurai pasal adat Dayak lebuh berumah, enti adat Dayak agi ngemeratka Tuai Rumah patut di tengah-tengah lalu sida ke diri menyadi jarang endar deka diapit orang buka
Naka ke diatu, rumah panjai ke nitihka spek HDC, di Bakong Miri lalu enti nitihka atur suba, agi benung nganti surat tanah nya diberi ngagai sida.
Ba pekara lun rumah panjai ku Abdul Karim, naka ke diatu, lun ke dijali kena ngaga bilik bisi RM10,000 sepintu.
“Tang bisi mega sekeda sida ke diau di rumah panjai minta lun tu ditambah besai agi…Tang taja pia penyampau tu dikena ngepunka dulu,” ku iya.
No comments:
Post a Comment