KUCHING: Sarawak betuah nadai kaul enggau undang-undang Hudud.
Menteri Muda Pengawa Berumah Datuk Abdul Karim Rahman Hamzah madah, nitih penemu iya Undang-undang Hudud nya endang enda patut dipejalai di menua tu tauka di Malaysia.
“Aku enda setujuka undang-undang Hudud dipejalai di nengeri tu, baka nya mega Barisan Nasional (BN) Sarawak enda tau enda tegap penemu nagang undang-undang nya ngerembai kitu.
“Sarawak, ngembuan mayuh pupu raban bansa enggau jalai pengarap, Undang-undang Hudud endang enda patut dipejalai ditu. Kitai enda tau enda meretika sentiment pengarap orang bukai, sereta nyangka sida enda ingatka Konstitusyen Perintah Besai ke meruan ke lalau sistem legal menua kitai lalu iya enda tau sengapa ditukar,” ku Abdul Karim.
Iya madah munyi nya lebuh dirandau pemberita pengudah betemu enggau raban exco Gerempung Pemberita Pelilih Menua Kuching (KDJA) enggau MLNG di opis menteri muda nya di Wisma Perumahan ditu, ensana.
Ku iya, undang-undang tauka sistem ba sesebengkah menua ukai utai ti tau ditukar sepeneka ati nitihka jalai politik tang semua kitai patut ngira orang bukai sekalika undang-undang tauka sistem nya diterima tauka enda.
“Kitai betuah di Sarawak, naka diatu nadai mayuh macham ulah tauka penusah nyadi, enda baka dipeda kitai di Kelantan. Perintah Besai enggau UMNO pan, pelaba aku betapi enggau penanggul mutarka Undang-undang Hudud ke baru dikemendar di Kelantan apin lama ke udah,” ku iya.
Iya nandu, ketuai kitai ke dulu suba udah ngemujurka Konstitusyen Perintah Besai lalu pia mega endang udah bisi sistem tauka undang-undang kediri empu.
“Enti undang-undang tauka sitem kitai ditukar enggau ngenyit taja pan nengah pejurai dalam Aum Kunsil Nengeri (Members’ Bill), semua nya patut dipejurai enggau manah laban bisi kaul enggau sekeda nengeri baka Sarawak ke enda begunaka undang-undang nya.
“Nitihka penemu aku, aku belajarka Undang-undang maya di universiti, kami belajar kededua set undang-undang, iya nya ‘Common Law’ sereta ‘Syariah’. Semua undang-undang endang bisi pemaik ungkup sesebuah komuniti,” ku iya.
Abdul Karim nandu, naka ke diatu, Undang-undang Malaysia udah chukup manah sereta bisi pengalus, enda ibuh ditukar.
“ Bisi orang nyebut, enti kitai enda nitihka ‘syariah’ tauka ‘Hudud’, kitai tu ukai Islam, tang dalam Al Quran, nadai nyebut munyi nya, semina nyebut chara perintah megai menua enggau manah,” ku iya.
Enti sema, Undang-undang Hudud dipejurai dalam Parlimen, Abdul Karim madah, BN nengeri tu deka mantaika penemu.
“Perintah BN nengeri tu deka mantaika penemu diri, PM Najib pan dipelaba deka mantaika penemu iya sereta sida ke bukai. Nya alai, aku ngarapka penemu PM dipesetujuka semua laban menua kitai tu diuan mayuh macham pupu bansa enggau jalai pengarap. Sesebengkah undang-undang patut dipesetujuka semua rayat sebedau tau dipejalaika. Tang enti enda diterima semua komuniti, perintah deka ngiga sebengkah sistem ke ulih mungkur semua raban bansa ti nguan menua tu,” tandu iya.
No comments:
Post a Comment