Nengah penemu raban menteri, parti politik dikemendar nabur manifesto pengawa bepilih nengah RTM
KUCHING: Perintah endang lama ngembuan runding tebuka, ditambahka agi diatu parti politik ba menua tu dikemendar naburka manisfesto pengawa bepilih nengah televisyen ba pengawa bepilih besai Ke-13 (PRU 13) ti deka datai.
Sekretari Besai Barisan Nasional Nengeri ke mega Kaban Kunsil Nengeri (ADUN) Kemena, Datuk Dr. Stephen Rundi Utom madah, nya meri awak ngagai rayat nemu sapa ti patut disukung.
Iya ti mega Menteri Muda Perengka Guna Mensia Mayuh (Elekterik enggau Perengka Penyambung) madah, perintah Barisan Nasional (BN) enda kala ngemeranka perangai bechiping ngagai rayat.
“Tu mandangka penemu perintah BN ngembuan runding tebuka ngambika rayat diberi awak milih sekalika patut nyukung perintah tauka enda.
“Penyakal enda patut nyaru runding rayat ngena penemu ke ngumbai perintah BN bechiping,” ku iya madah ngagai Utusan Borneo nengah Sistem Pesan Jaku Pandak (SMS) kemari.
Sepenemu enggau Dr. Rundi, Menteri Muda Pemansang Nembiak enggau Menteri Muda Pengawa Berumah, Abdul Karim Rahman Hamzah madah, nabur manifesto nengah televisyen nunjukka perintah BN beratka sistem demokrasi sereta nadai bechiping ngagai sesebengkah parti nyengkaum penyakal.
“Tu pekara ti engkeman lalu kitai ti nyadi rayat ulih berati sereta ngena peluang nya macha manisfesto parti ke meri awak ngagai kitai milih parti ti pemadu patut megai Malaysia kandang lima taun ti deka datai.
“Tu mega mandangka pekara ti dibantai penyakal ngelama tu iya nya pengawa bepilih Malaysia bechiping berita selebubu aja,” ku Karim ti mega ADUN Asajaya.
Nambahka nya Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah madah, nya nunjukka perintah ti dipegai Menteri Besai (Datuk Seri Najib Tun Razak) ngereja pengawa nitihka semaya.
“Nya meri peluang ti sama ngagai parti BN enggau penyakal,” ku iya ti mega ADUN Dalat madah nengah SMS ngagai Utusan Borneo.
Ketuai Parti Keadilan Rakyat (PKR) Nengeri, Baru Bian madahka diri temegah ati ngagai penemu tebuka perintah BN sereta patut udah lama dikemeranka, ku iya.
Baru ke mega ADUN Ba’Kelalan bepenemu, Radio Televisyen Malaysia (RTM) perengka penyambung ti patut endur naburka manisfesto laban diempu semua rayat ukai sesebengkah parti politik aja.
“Sistem demokrasi patut diberi awak mansang ba menua kitai, sebengkah atur ke aruh dikemeran tang ukai digerene RTM baka ke ayan ba riput BBC pasal Bersih 3.0.
“Ukai semina dikena nabur manisfesto tang patut diberi awak sebaka enggau BN kena kimpin,” ku iya ngarapka kimpin ngena media mega patut dikemendar.
Nitihka riput Bernama kemari, parti politik diatu dikemendar nabur manifesto pengawa bepilih sida nengah Radio Televisyen Malaysia (RTM), ku Menteri Penerang, Pemadah enggau Main Asal Datuk Seri Dr. Rais Yatim.
Iya madah pekara nya diputuska pengudah keretas kabinet bekaul peminta meri akses ti sama ngagai media ke parti politik ti deka naburka manifesto pengawa bepilih dikemendarka raban menteri menua tu.
No comments:
Post a Comment