KOTA SAMARAHAN: Program Pendidikan Lalu Lintas Shell (STEP) meri pemereti ati ngagai nembiak sekula tuju guna nitihka atur jalai alun.
Tuai Seketri Politik Kepala Menteri Abdul Karim Hamzah madahka tuju program nya kena matih nembiak sekula jemah ila lebuhka bisi kerita diri empu.
“Mayuh bala nembiak ke udah bulih lisin kelebih agi lisin mutusikal, lalu udah nya nyadi ‘mat rempit’, ti ngujungka mayuh penusah bebadi ba jalai alun.
“Nya kebuah aku ngarapka program baka tu ulih matih tauka ngajar nembiak ari tumu, munyi ku sempama ‘melentur buluh biarlah dari rebungnya’,” ku iya lebuh bejadika nutup program ba Konsortium Memandu Samarahan ditu kemari.
Karim mega muji Shell laban mujur ngatur program ti nguntungka, iya nya ngemeratka pengelikun semua rayat.
Dulu ari nya, Pengurus Hal Ehwal Korporat Shell Sarawak Peing Tajang mega madahka program nya enda ulih dipajakka seagi penusah bebadi ba jalai alun bisi nyadi.
Ku iya, Shell sebengkah raban korporat ti bejalaika tanggung pengawa ti chukup berega laban ngatur program ti nyelamat tauka ngintu pengelikun mensia mayuh.
“Kami ngarapka nembiak nguna semua utai ti dipelajar ari program tu sereta nguna penemu nya datai je jemah ila,” ku iya.
Ba program nya mayuh macham pengawa ke diatur nyengkaum pengelikun bejalai kaki, bekenaka basikal, driba kerita, bepekit pidato, peresa ngena nulis enggau ‘inter-aktif’ komputer.
Dalam katogeri sekula primari, lumur satu SJK Chung Hua Serian, lumur dua SK Abang Abdul Kadir lalu lumur tiga SK Dato Traoh.
Renggat sekula sekendri, lumur satu SMK Kota Samarahan, SMK Serian tulihka lumur dua lalu SMK Pesantren Abdul Taib Mahmud lumur tiga.
Bisi sama ngulu program STEP nya kemari, Wali Kota sitak Samarahan Frederick Bayoi, Residen sitak Samarahan Rodziah Morshidi enggau Sapit Residen (Sosial) John Awan.
No comments:
Post a Comment