Pekara nya entara Kot Tinggi enggau SPRM, tepulai ba sida enti deka ngapil baru tauka enda
KUCHING:Pemutus Kot Tinggi Kuching nginsil notis pengawa magi garis sitak Kunsil Nengeri ti dipejalai Komiti Pengawa Bepilih (SPRM) bedau lama tu tadi,nadai nanggul Barisan Nasional (BN) nyendiaka diri napi Pengawa Bepilih Kunsil Nengeri, ku Sekretari Besai BN Menua Datuk Dr. Stephen Rundi anak Utom.
“Ba pemutus Kot Tinggi ti digaga bedau lama tu tadi bekaul enggau pengawa magi garis sitak Kunsil Nengeri baru nya entara SPRM enggau Kot Tinggi.
“Ba penemu BN, enti SPRM deka ngapil, nya barang ku sida iya laban sida iya nemu agi kini tunga kuing ke patut dituju sida iya. Kami (BN Menua) nadai kaul enggau penemu SPRM, nya entara SPRM enggau Kot Tinggi,” ku Rundi.
Ba penemu exco Parti Pesaka Bumiputera Bersatu Sarawak (PBB), ti mega nyadi Menteri Muda Pengawa Berumah Datuk Abdul Karim Rahman Hamzah madahka pemutus Kot Tinggi nya enda ngachau penuduk BN.
“Enda ngira semua kerusi nya 71 tauka 82, enda ngachau…Kami ditu gawa ke rayat. Ni naka pemayuh kerusi nya pan, nambah tauka enda, BN Sarawak udah besedia,” ku Abdul Karim.
Sarawak dijangka deka ngatur pengawa Bepilih Kunsil Nengeri (PRN), pemadu laun bulan Jun taun baru tu ila, beratika timpuh Kunsil Nengeri ke diatu abis timpuh manggai Jun 2016.
Hari Satu nyin tadi, Hakim Kot Tinggi Kuching, Datuk Yew Jen Kie minta notis ti dikeluarka bekaul enggau pengawa magi garis entara sitak DUN ti dikeluar SPR kena 5 Januari tu tadi, dikinsil sereta enda dikemendarka kelimpah ari enda ngachau pekara bekaul enggau undang-undang.
“Enti nitih, patut bisi notis dikeluarka bekaul enggau peambu magi garis sitak Kunsil Nengeri menua ke ulih dikena PRN baka dalam ungkup undang-undang dalam Seksyen 4, Jadual 13.
“Ketegal nya, iya di kinsil lalu enda dikemendarka sereta enda ngachau undang-undang,” ku Kot Tinggi nya.
Yew, lebuh ngaga pemutus ba kena 15 Mei 2015 tu tadi ti dibantai Kaban Kunsil Nengeri (ADUN) Batu Lintang, See Chee How enggau seiku pengundi ari Ulu Baram, Pauls Baya, besetuju enggau penemu See, iya nya bisi pengurang ba sent ang penerang dalam notis ti dikeluarka kena 5 Januari 2015 tu tadi.
Iya madah, bisi kebuah SPR ngeluarka baru rejista nama pengundi, lis ubah ti diperambu ungkup sitak ke kena bungkur nya ti ulih dipeda mensia mayuh lalu meri penemu ngagai sida iya enti sema pemutus nya bisi bekaul enggau sida iya (mensia mayuh).
Iya nandu baru, SPRM ke enda mujur ngeluarka notis enggau silik ngelanggar atur di luar sereta dalam Perlembagaan Persekutuan.
No comments:
Post a Comment