Sunday 26 April 2015

Ketuai patut ngembuan pengelurus ati ngeluanka sesebuah gerempung


KUCHING: Pengawa tauka ulah ti enda bechiping ba seseiku ketuai sereta raban komiti dalam sesebengkah gerempung lebuh bejalaika tanggung pengawa deka nentuka pemansang tauka kuing gerempung.

Menteri Muda Pemansang Nembiak (Mengeri) Datuk Abdul Karim Rahman Hamzah madah, ketuai sereta kaban dalam sesebengkah gerempung patut tetitihka juluk kebuah gerempung nya ditumbuhka.

Ku iya, kaban gerempung ke dipilih megai belanja patut landik nguna belanja ke penguntung gerempung sereta semua kaban.

“Enti deka maju, ketuai dalam sesebengkah gerempung nyengkaum gerempung nembiak tauka Komiti Pemansang enggau Pengelikun (JKKK) Genturung Pendiau sereta semua kaban dalam gerempung patut ulih tetitihka tuju gerempung nya ditumbuhka.

“Ketuai enda tau enda ngembuan pengeliat enggau pengelurus ati lebuh ngiring tauka ngeluan gerempung.

“Duit bantu ti diberi perintah ngagai gerempung nyengkaum gerempung raban nembiak, bala ketuai dalam gerempung enda tau enda landik ngatur program senipak enggau geran ke dipinta.

“Kitai enggai meda ulah ketuai sekalika dalam gerempung nembiak tauka JKKK enggau ke bukai ti deka mangku pengawa dalam gerempung semina ketegal deka ngenebalka kuchik tanchut diri,” ku iya seraya madahka pekara ti baka nya kala nyadi nyengkaum ba gerempung jalai pengarap.

Karim mansutka penemu iya lebuh bejadika ‘Majlis Perundingan Belia Negara’ Renggat Nengeri Sarawak (MPBNg) ti diatur Opis Raban Nembiak enggau Lumba enggau Main Nengeri Sarawak ba Dewan Suarah ditu, lemai kemari.

Nambahka nya, iya madahka raban nembiak aset ti pemadu besai guna dalam menua, ti nentu sereta ngiring pemansang menua jemah ila.

Berindik ari nya, raban nembiak ti nyadi penyanding sereta dikearapka perintah tauka menua, patut ulih mantu mutar sereta nyeliahka penanggul rama tauka enda ngereja penyalah ti ngelanggar undang-undang.

“Enti kitai deka meda pemansang sesebuah menua jemah ila, kitai ulih belalauka iya ba raban nembiak kitai diatu.

“Nya alai perintah enggau naka pemendar ngatur tuju tauka kuing raban nembiak ngambika enda limpang ngagai jalai ti salah, laban enti udah limpang ngagai penanggul rama sereta penyalah ke bukai, tu deka ngeruga raban bansa, nengeri enggau menua,” ku iya.

Kelimpah ari nya, dalam jaku pengelalu Direktor Opis Nembiak Lumba enggau Main, Abd Haris Ishak madahka Sarawak patut ngembuan ‘Majlis Perundingan Belia’ renggat nengeri baka nengeri bukai di Malaysia.

“Berindik ari pekara nya, aku ngasaika kitai patut bisi Majlis Perundingan Belia renggat nengeri, laban nengah nya ba renggat nengeri kita ulih nyadi sebengkah gerempung ti deka besaup ngemansangka raban nembiak nyentuk ngagai renggat nasional,” ku iya.

Aum MPBH renggat nengeri ti diatur sehari kemari berengkah pukul 8 pagi nyentuk 5 lemai digulu 20 bengkah gerempung nembiak enggau 13 gerempung lumba enggau main.

Entara pekara ti dipejuraika dalam aum iya nya isu kemaya hari tu ti nyengkaum pelajar, isu rama tauka peluang gawa sereta ekonomi.

Tuju aum Majlis Perundingan Belia Negara ti diatur setaun sekali kenyau ari taun 1971, dikena ngangkatka pemanah program pemansang nyadi ketuai enggau chara ngatur organisasyen nembiak, berandauka isu enggau penanggul ti ditapi nembiak nyerumba pemansang nembiak dalam semua peringkat, ngiga chara napi isu pemansang nembiak enggau ke bukai.
 

No comments:

Post a Comment