Wednesday 14 January 2015

Karim: UPP kaban BN


Parti komponen BN bukai patut bebasa sereta badu bejaku pasal pekara nya

KUCHING: Penatai Sapit Presiden Parti Pesaka Bumiputera Bersatu (PBB),Datuk Amar Abang Johari Tun Openg ngagai Aum Pengari Tiga Taun Sekali (TDC) ti keterubah endar diatur Parti Rakyat Bersatu (UPP) kelai bebasaka parti nya, ti ngembuan ideologi politik ke sebaka enggau Barisan Nasional (BN).

Kaban Kaunsil Besai PBB Datuk Abdul Karim Rahman Hamzah madah, berindik ari nya parti komponen BN ke bukai patut mereti sereta anang bejakuka pekara nya agi, laban nya semina deka ngeruga gaya politik di nengeri tu.

Ku Menteri Muda Pemansang Raban Nembiak (Mengeri) nya, sekalika UPP tauka Parti Sa’ati Rakyat Sarawak (SUPP), sida endang kaban PBB.

“Baka PBB bebasaka SUPP ke nyadi kaban komponen BN, PBB mega bebasaka raban ti bekaban enggau BN baka UPP, ti ngembuan ideologi politik ti sebaka enggau BN.

“Tambah mega pengari rayat UPP dipilih rayat nyadi chalun BN sereta duduk ba sepiak ‘perintah’ dalam Kunsil Nengeri (DUN) ke lebih agi dalam Kabinet Nengeri,” ku iya madah ngagai Utusan Borneo ditu, kemari.

Iya mansutka jaku tu lebuh nimbal pasal penerang SUPP ti madahka diri enda lantang ati ngagai ketuai kanan BN nengeri ti mega sapit Presiden PBB, Datuk Amar Abang Johari Tun Abang openg ke ngulu TDC UPP apin ti lama.

Presiden SUPP Senator Datuk Dr. Sim Kui Hian dalam penerang berita madah, ulah Abang Johari deka ngeyaru sereta mandangka gaya politik ti salah ngagai rayat Sarawak enggau kaban SUPP ke bukai.


Abdul Karim minta SUPP ngambika enda ngetu mandangka diri ringat nengah chara mansutka penerang bekaul enggau penatai pemesai nya ke ngulu aum nya.


“Mayuh agenda bukai ti besai agi ke patut dikemerat lalu ukai ngemesaika pekara tu.

“Ngambika semua orang nemu nyengkaum penyukung SUPP, SUPP endang kaban PBB,” ku iya seraya ngarapka SUPP ngetuka ulah sida dikena nendurka pekara nya.

Kelimpah ari nya, Dr. Sim dalam penerang iya madah, SUPP bebendar mantah UPP masuk BN lalu nengah TDC SUPP ke diatur kena September taun nyin kemari sepenemu pasal pekara nya.

“SUPP deka bediri minta pilih ba semua 19 iti sitak ti udah diungkupka nyengkaum sitak baru nyema diberi,” ku iya.

Dr. Sim mega madahka SUPP deka mai isu nya ngagai Kaunsil Besai BN ngambi diperundingka.
  

No comments:

Post a Comment